foto: stan.kz
Bul týraly Ishki ister mınıstrliginde ótken brıfıngte Ákimshilik polısııa komıtetiniń bólim basshysy Áset Ospanov aıtty. Ol balalarǵa qatysty zorlyq-zombylyqty anyqtaý úshin ákimdikter janynan mobıldi toptar qurylǵanyn eske saldy. Olar óz jumysynyń aıasynda óz mindetterin oryndamaı júrgen ata-analardy anyqtady.
Balalardyń quqyqtaryn qorǵaý komıssııasy 1800 materıaldy qarap, 600 ata-anany quqyǵynan aıyrý, 340-yn shekteý týraly sheshim qabyldady.
Sondaı-aq oqý jylynyń basynan beri tártip saqshylary jasóspirimder arasynda 1400-den astam beıresmı jetekshilerdi anyqtaǵan. Olardyń barlyǵy baqylaýǵa alyndy. Tártip saqshylary kámeletke tolmaǵandardy bopsalaý boıynsha 40 faktiniń jolyn kesti.
«Jalpy, sońǵy 10 jylda kámeletke tolmaǵandarǵa qatysty jasalǵan quqyq buzýshylyqtar úsh esege jýyq azaıdy. О́kinishke qaraı, jasóspirimder ǵalamtor arqyly kúmándi adamdarmen tanysyp, páter jaldap, túrli is-sharalardy toılaıdy, kóp jaǵdaıda ata-anasynyń baqylaýynsyz ishimdik iship, esirtki qoldanady, sonyń saldarynan qylmystyń qurbanyna aınalady», dedi Ospanov.
