«Búginde búkil álem memleketterdiń aldaǵy uzaq jylǵa damý vektoryn aıqyndaıtyn óte kúrdeli tarıhı kezeńdi bastan ótkerip jatyr. Biz ýaqyt kóshine ilesýimiz kerek – tez ári batyl. Ýaqytty bos sózben ótkizbeı, naqty isterdi qolǵa alyp, saıası jaýapkershilik tanytýymyz kerek», dedi Prezıdent.
Mınıstrler men ákimderdiń naqty nátıje kórsetý merzimi de belgilense kerek. Odan keıin uıymdyq qorytyndylar jáne tıisti kadrlyq sheshimder qabyldanýy múmkin. Tyǵyz jáne naqty merzimder – memlekettik apparatty kásibılendirýdiń alǵashqy qadamy. «Eldi mekenderdegi tirshilikti qamtamasyz etýdiń barlyq júıesiniń úzdiksiz jumysyn qamtamasyz etý – Úkimet pen ákimdikterdiń negizgi fýnksııalarynyń biri. Degenmen, ár jylytý maýsymy bir máseleniń betin ashady», dedi Qasym-Jomart Toqaev.
Prezıdent memlekettik organdar salany qazirgi jaǵdaıǵa jetkizgen júıeli qateler men olqylyqtardan sabaq almaǵanyn da ashyq synǵa aldy. «On jyldan astam ýaqyt Ekibastuz GRES-1 energııa blogin qalpyna keltire almadyq. Ekibastuz GRES-2-de keńeıtý jáne qaıta qurý jobasyn ýaqtyly júzege asyrýǵa qatysty máseleler bar. Úkimettiń basym mindeti – bıyl qyzyl táýekel aımaǵynda ornalasqan 19 jylý kózin jańǵyrtýdy aıaqtaý. Sondaı-aq 700 megavattan astam qosymsha generasııany engizýdi qamtamasyz etý qajet. Endi keıinge qaldyrýǵa bolmaıdy», dep tapsyrdy Memleket basshysy.
Tutastaı alǵanda, Prezıdent elimizde elektr, jylý jáne sýdy óndirý jáne tasymaldaý boıynsha qýat tapshylyǵy baıqalyp otyrǵanyn málimdedi. Bul – Balqash JEO qurylysyn aıaqtaýdan bas tartý, tabıǵı monopolııalar sýbektileriniń jumysynda ashyqtyq, sondaı-aq tarıfterdi jasandy túrde tejeý sııaqty úlkendi-kishili kóptegen qate esepteýdiń saldary. Bizge birneshe júıelik elementti qamtıtyn salany tereń reformalaý qajet.
Memlekettik qyzmetterdiń tarıfterine qatysty Qasym-Jomart Toqaev resýrstardy esepke alý jáne derekterdi onlaın berý júıesin engizýdi tapsyrdy. Onyń aıtýynsha, tarıfterdiń kóterilýi tutynýshylardy maqsatty sýbsıdııalaýmen qatar júrýi kerek. Bul úderisti barynsha jeńildetý jáne avtomattandyrý qajet. Úkimet eldiń kommýnaldyq-energetıkalyq ınfraqurylymyn qalpyna keltirý jáne damytý sharalary keshenin ázirleýge tıis. Qalalardy abattandyrýǵa, olardyń lastanýymen kúresýge ákimder de belsene aralasýy kerek.
Bıbigúl JEKSENBAI,
Senat depýtaty
