Eń aldymen, elimizdiń sapaly ekonomıkalyq damýyn jáne azamattardyń naqty tabysynyń ósýin qamtamasyz etý qajet. Prezıdentimiz atap ótkendeı, ol úshin memlekettik apparattyń jumysy naqty nátıjege baǵyttalýǵa tıis. Sondaı-aq ekonomıkada muqııat zerdelengen, batyl áreket kerek.
Osyǵan oraı Úkimetke bıýdjet jáne salyq saıasatynyń tıimdiligin barynsha arttyrý mindeti júktelip otyr. Memleket basshysy jańa Salyq kodeksin ázirleý barysynda ınvestorlarǵa jáne kásipkerlerge qolaıly jaǵdaı jasaý men bıýdjetke qajetti kólemde qarjy túsirýdiń arasynda teńgerim bolý kerektigin atap ótti.
Sondaı-aq Prezıdent tıimdi damý úshin ekonomıkany keshendi túrde yryqtandyrýdyń mańyzy zor ekenin aıtty. Memlekettiń ekonomıkalyq úderisterge shamadan tys aralasýynan bas tartý qajet. Baqylaýsyz monopolııany, resýrstardy ádiletsiz bólýdi, básekeniń zańsyz tásilderin qoldanýdy da joıý qajet.
Memleket basshysy agroónerkásip keshenin damytý jáne sý resýrstaryn únemdep paıdalaný máselesine de basa mán berdi. Aldaǵy ýaqytta aýyl sharýashylyǵyn qarjylandyrý dáıekti túrde artady. Jerdi barynsha tıimdi paıdalanyp, zamanaýı agrotehnologııalardy engizemin degen sharýalarǵa memleket tarapynan jan-jaqty qoldaý kórsetiledi. Bul rette úsh jyl ishinde agroónerkásip salasyndaǵy óńdelgen ónimniń úlesin 70 paıyzǵa jetkizý basty mindet ekenin atap ótken jón.
Agrarlyq sala úshin sý asa mańyzdy resýrs ekeni belgili. Elimizdiń ońtústik óńirlerinde sý tapshylyǵy óte ózekti másele. Sondyqtan sý únemdeý tehnologııasyn engizý jáne sýdy kóp qajet etetin daqyldardy azaıtý baǵytynda júıeli jumys júrgizý qajet. Bul rette shet memleketterdiń ozyq tájirıbelerin zerdelep, elimizde sýdy únemdep paıdalaný mádenıetin qalyptastyrý jolynda irgeli isterdi qolǵa alý qajet ekeni aıtyldy.
Sonymen qatar Prezıdent ınfraqurylymdy damytý salasynda shuǵyl sharalar qabyldaý kerektigine nazar aýdardy. Bul baǵytta Úkimettiń aldynda, birinshi kezekte, buǵan deıin bastalǵan jylý ortalyqtaryn jańǵyrtý jumystaryn aıaqtaý jáne qosymsha qýat kózimen qamtamasyz etý mindeti tur.
Elimizde respýblıkalyq mańyzy bar joldardy jóndeý jumystaryn aıaqtaý jáne temirjol salasyndaǵy ózekti máselelerdi sheshý de erekshe mánge ıe. Mundaı keshendi qadam Qazaqstandy Eýrazııanyń tolyqqandy kólik-logıstıkalyq habyna aınaldyrýǵa múmkindik beredi.
Qasym-Jomart Toqaev mańyzdy baǵyttardyń biri sanalatyn áleýmettik salany reformalaýǵa da aıryqsha toqtaldy. Qazirgi tańda respýblıkalyq bıýdjettiń jartysyna jýyǵy atalǵan salaǵa bólinip jatyr. Sondyqtan memleket qarajatyn jumsaýdyń tıimdiligi erekshe baqylaýda bolýy kerek. Mindetti áleýmettik medısınalyq saqtandyrý júıesiniń jumysyn baqylaý, halyqqa kórsetiletin medısınalyq qyzmetterdiń sapasyn arttyrý jóninde de naqty tapsyrmalar berildi.
Keńeıtilgen otyrysta Prezıdent memlekettik satyp alý, memleket pen jekemenshik seriktestigi, qurylys salasyn retteý júıesin reformalaýǵa arnalǵan mańyzdy zańdar qabyldaý kerektigin de atap ótti. Senat depýtattary bul baǵyttaǵy tıisti zań jobalaryn pysyqtaýǵa jáne Qala qurylysy kodeksin ázirleýge belsendi qatysady.
Bul iste Senat Úkimetpen konstrýktıvti ózara is-qımyldy ári qaraı jalǵastyryp, Prezıdent júktegen mindetterdiń oryndalýyn zańnamalyq turǵydan qamtamasyz etý úshin tıisti jumysty sapaly ári ýaqtyly atqaratyn bolady.
Máýlen ÁShIMBAEV,
Senat tóraǵasy
