Osylaısha bıyl da Almatyda Qazaqstan koreıler qaýymdastyǵy Shyǵys Jańa jylyn aıta-aıta júrerlikteı atap ótip, Respýblıka saraıynda ótken meıramǵa eki myńnan astam qonaq, birneshe júzdegen óner maıtalmandaryn jınady. IýNESKO-nyń materıaldyq emes mádenı muralar tizimine engen koreı ulttyq áni «Arırannyń» 60 shaqty nusqasy, 3600-deı túri bolsa, sonyń bir ǵana varıasııasyn tórt birdeı hor – «Rodına», Bıdangıl, «Edelveıs», «Radýga» ansamblderi oryndady. Al «NamSon» halyqtyq bı ansambli, «NamSon» balalar hory, «Hassak» etnofolklorlyq ansambli, «Saran», «Bıdýlgı» ansamblderi, «Namson family» koreı óneri stýdııasy, «Insam» shoý-toby, Respýblıkalyq memlekettik akademııalyq koreı mýzykalyq komedııa teatry sahnany naǵyz merekelik saltanatqa bóledi.
Aıtqandaı, Almatydaǵy Koreı mýzykalyq komedııa teatry Qazaqstanda ǵana emes, álemdegi eń alǵashqy etnıkalyq jáne Koreı túbeginen tys jalǵyz memlekettik ári erekshe taǵdyrly koreı teatry ekenin aıta ketý kerek.
Al eki myń jyldyq tarıhy bar Sollal meıramyna qaıta oralatyn bolsaq, ol eń basty ári qoǵamdyq mańyzdy mereke retinde 1989 jyly ǵana resmı tirkelgendikten, Koreıanyń ózinde bizdiń táýelsizdik bederindegi Naýryz meıramy sııaqty, sońǵy 15-20 jylda aýqymdy deńgeıde toılana bastaǵan. Degenmen, koreı halqynyń úlkenderi Aı kúntizbesi boıynsha keletin jańa jylyn umyttyrmaý úshin otbasynda dáriptep, dástúrlerin jasap otyrǵan desedi.
Sollal merekesi yqylym zamandarda birneshe apta qatarynan toılansa, onyń alǵashqy jáne sońǵy kúni asa mańyzdy bolǵandyqtan, jastar bıik qyrattarǵa, tóbege júgirip shyǵyp, kim birinshi tolǵan Aıdy kórse sol adam jyl boıy baqytqa keneledi dep sengen. Al qazirgi zamanaýı Koreıa bul meıramdy úsh kún qatarynan toılaıdy jáne otbasylyq mereke bolǵandyqtan, árbir adam týǵan úıine, áke-sheshesine asyǵady. Ádet-ǵuryp boıynsha aldymen chhare – ótken-ketken ata-balardy eske alý rásimine arnalǵan dastarhan jaıylady. Ekinshi rásim – sebe. Úlkender mereke kúni tańerteń mindetti túrde kishkentaı balalarǵa sebedon taratqan kezde eresekter betin ońtústikke, hanbokı (ulttyq kıim) kıgen bala-shaǵa soltústikke qarap turady. Balalar jasynan qaraı, úlkeninen bastap ıilip sálem berip, ata-ájeleri bata, rızashylyq retinde aqsha taratady. Osydan keıin ǵana úı ishi úshinshi rásimge oralyp, ótken arýaqtarǵa jaıylǵan dastarhan basyna jınalyp, ótken kisilerden densaýlyq, otbasynyń amandyǵyn surap, dámnen aýyz tıedi. Sollal merekesin qysqasha osylaı sıpattaýǵa bolady.
Almatydaǵy mereke, aldymen Qazaqstan Respýblıkasynyń Ánuranymen bastalyp, qoldaryn júrekterine basyp, dúrk etip kóterilgen otandastarymyzǵa Qazaqstan koreıleri qaýymdastyǵynyń tóraǵasy, belgili kásipker Iýrıı Shın júrekjardy lebizin arnady.
Iýrıı Germanovıch: «Jańa jyl – ótkenge esep berip, aldaǵy kúnderge jospar quratyn ýaqyt qana emes, qoshtasqan jylda bizge qoldaý bildirgen, kómektesken, barshamyzdyń ortaq úıimiz – Qazaqstannyń kórkeıýine, Koreıler qaýymdastyǵynyń damýyna úlkes qosqan árbir adamǵa alǵys aıtatyn kún!», deı kele, koreı tili men dástúrin umyttyrmaı, jalǵastyryp kele jatqan qandastaryna taǵzym etti.
«Bizdiń árqaısymyz qazaqstandyqpyz, óz boıynda talantymen birge kemshilikteri de bar qarapaıym adamdarmyz. Bir shańyraqtyń astynda týylǵan árqaısymyzdyń Qazaqstan azamaty bolýǵa quqyǵymyz bar. Biz bárin birdeı qurmettep, árbir otandasymyzdy baǵalaýymyz kerek. Biz ártúrlimiz, biraq teńbiz jáne biz birtutaspyz. Siz ben biz úshin, balalarymyzdyń, elimizdiń jarqyn bolashaǵy úshin Otanymyzdy súıip, elimizdiń ár qalasyna, ár aýylyna seneıik! Ultaralyq birliktiń kúshi arqyly elimizdiń abyroıyn asqaqtata bereıik. О́ıtkeni, biz uly jaýyngerlerdiń urpaǵymyz! Uly Dala, Uly El, Uly Qazaqstan, Sollal merekesi qutty bolsyn», dedi Iýrıı Shın.
Quttyqtaýlar legin Ońtústik Koreıanyń Almatydaǵy bas konsýldyǵynyń Bas konsýly Nechhon Pak jalǵastyrdy. Saltanatty oqıǵa aıasynda QR Mádenıet jáne aqparat mınıstrliginiń pármenimen «NamSon» koreı bı ansambline «Halyqtyq» (úlgili) kórkemónerpazdar ujymy ataǵy berilip, mártebeli syılyq ansambl jetekshisi Marına Kımge tapsyryldy.
Quttyqtaýlar sahnany ertegideı álemge almastyrǵan, búkil mýzykalyq tehnologııalardyń tabysyn toǵystyrǵan ǵalamat konsertke ulasty.
