Jańa Úkimet osy baǵyttaǵy zańnamalyq quqyqtyq máselelerdi durys sheshetin bolsa, memleket deńgeıinde qabyldanǵan sheshimderdiń iske asyrylýy jeńildeıdi, oń nátıje beredi dep senemin. Sonymen qatar áleýmettik ádildik týraly kóńilge qonymdy oı aıtyldy. Shyndyǵynda da áleýmettik ádildik eldegi ekonomıkalyq damýǵa da oń serpin beretini sózsiz. Bilim men biliktilikke basymdyq, durys baǵa berilip, áleýmettik ádildik ornaǵan jerde turaqtylyq bolady. Qazirgi tańda bizdiń ekonomıkaǵa qajetti dúnıe – ınvestısııa tartý bolsa, ınvestor retinde ár adam óz qarjysyn tek turaqtylyq jaılaǵan elge salǵandy qup kóredi. Olaı bolsa eldegi turaqtylyq ishtegi óz máselemiz ǵana emes, jalpy ashyq álemmen qarym-qatynas jasaýdyń, bizdiń damýymyzǵa basqalardyń óz qarjysyn quıýdyń negizi bolyp sanalady.
Budan bólek, memleket pen jekemenshik seriktestik baǵytyndaǵy jumysty jandandyrý da mańyzdy. Bul baǵyttaǵy jumys áleýmettik salada táp-táýir jolǵa qoıylyp keledi. Mysaly, qazir jekemenshik balabaqshalardy qarjylandyrý baǵytynda qolǵa alynǵan sharalar jemisin berip, demografııalyq ósimniń artýyna septigin tıgizip otyr. Biraq balabaqsha men mekteppen qamtamasyz etý isinde áli de artta kele jatyrmyz. Eger memleket pen jekemenshik seriktestiktiń qarym-qatynasyn zańnamalyq turǵyda nyǵaıtyp, retke keltiretin bolsa, onda búgingi olqylyqtardyń ornyn toltyra alar edik.
Qazir qaı óńirdi alsaq ta, úıge kezekte turǵan adam kóp. Bul baǵytty retteý úshin de osy jekemenshik seriktestik salasyn damytý qajet.
«Bizdiń aldymyzda turǵan negizgi mindet – adamdardyń qaýipsizdigi», dedi Memleket basshysy. Olaı bolsa, qurylys, mektep pen balaqsha salý, onyń ishindegi qyzmeti bolsyn, bul jerde adamnyń qaýipsizdigin saqtaý eń qajetti nárse. Qoǵamnyń senimin arttyrý úshin bul baǵyt senimdi bolýy kerek. Jer silkinisi sekildi tabıǵı apattar barysynda kókeıimizde: «Salyp jatqan úılerimiz sapaly ma? Mektepke jibergen balalarymyz aman-esen úıge qaıta ma? Olarǵa berilip jatqan bilim jetkilikti me? Mektepke jumysqa alynǵan mamandardyń biliktiligi men bilimi saı ma, psıhologııasy balamen jumys isteýge laıyqty ma?» degen saýaldar turady. Bul da – Prezıdenttiń jańa qurylyp jatqan Úkimettiń aldyna qoıyp otyrǵan zor mindetteriniń biri.
Jemqorlyq búginde taldyń ózegin kemirip jep jatqan qurt sekildi. Onymen kúres tabandylyqpen júrýi kerek. Teginde qoǵamnyń sanasyn ózgertpeı, jemqorlyqty tyıa almaımyz. Qoǵamnyń tártip buzýǵa qarsy ımmýnıteti myqty bolýǵa tıis. Ár adam para bermeı, para almaı ómir súrý qaǵıdatyn qatań saqtap, óskeleń urpaqty adaldyqqa dáriptep, asyl qundylyqty boıyna sińirsek qana jetistikke jetemiz.
Prezıdent muny Úkimetke tapsyra otyryp, jalpy qoǵamǵa oı tastady.
Sonymen qatar ekonomıkany sıfrlandyrý máselesin de aıtty. Bul – óte durys baǵyt. О́ıtkeni qarjylyq qarym-qatynas tek qana sıfrlyq jolmen ótetin bolsa, jemqorlyqqa balta shabýǵa múmkindik týady.
Aýyl sharýashylyǵy týraly da tushymdy oılar aıtyldy. Sý tapshylyǵyn retke keltirýdiń joldaryn qarastyrýdyń mańyzdylyǵyna toqtaldy. Bizdiń el – aýyl sharýashylyǵynan úlken múmkindigi bar memleket. Keler urpaqty oılasaq, bul baǵyttaǵy jumysqa bir jaǵadan bas, bir jeńnen qol shyǵaryp, qoǵam bolyp atsalysýymyz kerek. Úkimetke artylǵan mindettiń oń nátıjesin kútip qana qoımaı, birlesip iske kiriskende ǵana elimiz damýdyń dańǵyl jolyna túsedi.
Názıpa ShANAI,
Qazaqstan halqy Assambleıasy respýblıkalyq Analar keńesiniń tóraǵasy
