Foto: akorda.kz
Memleket basshysy seriktestikke tyń serpin berý úshin joǵary deńgeıdegi Qazaq-qatar birlesken komıssııasynyń jáne Iskerlik keńestiń jumysyn jandandyrýdy usyndy. Qazaqstan tarapy jaqynda ratıfıkasııalanǵan Investısııalardy ózara kótermeleý jáne qorǵaý týraly kelisimniń eki el arasyndaǵy ınvestısııalyq yntymaqtastyqty nyǵaıta túsetinine senim bildiredi.
«Búgin Joǵary Mártebeli sheıh Támım ben Hamad Ál Tánımen kezdesý barysynda men alǵashqy qadam retinde ekijaqty saýda kólemin jarty mıllıard dollarǵa deıin ulǵaıtýdy usyndym. Biz Qatar naryǵyna mashınalar, temir, bolat, aýyl sharýashylyǵy ónimderi jáne basqa da joǵary sapaly taýarlardy jetkize alamyz. Sonymen qatar Qazaqstan JIО́ kólemi 2,6 trıllıon dollar bolatyn Eýrazııalyq ekonomıkalyq odaq naryǵyna jol asha alady. Biz Qytaımen shekaralas elmiz. Bul «Bir beldeý, bir jol» jobasy aıasynda saýda-sattyq júrgizýge jaqsy múmkindik», dedi Qasym-Jomart Kemeluly.
Prezıdenttiń aıtýynsha, búginde vızasyz rejım men apta saıyn ushatyn 20-ǵa jýyq tikeleı reıstiń arqasynda Qazaqstan men Qatar baılanystary burynǵydan da nyǵaıa tústi. Buǵan qosa, elimiz óziniń kólik-logıstıkalyq áleýetin ártaraptandyrýmen jáne keńeıtýmen belsendi túrde aınalysyp jatyr.
«Kaspıı teńizindegi eń iri habtardyń biri sanalatyn Aqtaý porty, Astana jáne Almaty halyqaralyq áýejaılary, qarqyndy damyp kele jatqan kóptegen temirjol jáne avtomobıl joldary, sondaı-aq joǵary sapaly logıstıka toraptary men habtar iri ınfraqurylymdyq jobalarymyzdyń qataryna kiredi. Biz Transkaspıı halyqaralyq kólik baǵytynan nemese Orta dálizdiń damýynan zor úmit kútemiz. Qatar kompanııalary men qarjy ınstıtýttary osy saladaǵy bıznes pen ınvestısııa múmkindikterin qarastyrý arqyly qomaqty paıda tabady dep sanaımyz. Búgin biz jalpy ınvestısııalyq quny 18 mıllıard dollarǵa jýyq túrli kommersııalyq qujattarǵa qol qoıamyz. Bul ekonomıkalyq yntymaqtastyqty damytýǵa batyl kiriskenimizdi kórsetedi», dedi Memleket basshysy.
