Foto: parlam.kz
«Zań jobasyndaǵy normanyń biri baqylaý jáne qadaǵalaý sýbektisin aldyn ala habardar etpeı stasıonarlyq tıptegi ınternattyq uıymdarǵa, sondaı-aq menshik túriniń barlyq nysandarynyń bilim berý uıymdaryna jospardan tys tekserý júrgizý bolyp tabylady. Balalardyń saýyqtyrý lagerimen baılanysty 2023 jylǵy rezonanstyq oqıǵalardy eskere otyryp memlekettik bıýdjetten balalardy emdeýge, bilim berýge, saýyqtyrýǵa, tamaqtandyrýǵa memlekettik tapsyrys ornalastyrylatyn obektilerde memlekettik baqylaýdy júzege asyrý boıynsha birneshe problema bar. Ony biz de talqylaǵanbyz. Jalpy mundaı norma qajet. Men ony tolyǵymen qoldaımyn. Biraq mynandaı suraq týyndaıdy. Naqty qandaı uıymdar stasıonarlyq tıptegi ınternattarǵa jatatynyn aıtyp beresiz be?», dedi D.Muqaev.
Juldyz Dosbergenqyzy ınternat uıymdarynda turatyn balalardyń quqyqtaryn qorǵaýdy qamtamasyz etý úshin áleýmettik mańyzy bar kedergisiz tekserý júrgizý jónindegi normalar kózdelgenin aıtty.
«Bul jabyq ınternattyq mekemeler. Onyń ishine balalar úıi de kiredi. Sonymen qatar arnaıy medısınalyq jáne áleýmettik kómek kórsetetin uıymdardy ataýǵa bolady. Biz mysaly komıtetpen Qaraǵandy qalasyndaǵy osyndaı arnaıy áleýmettik medısınalyq kómek kórsetetin ortalyqqa bardyq. Ol jerdegi balalar týǵanynan múgedek tósekke tańylǵan balalar. Olar arnaıy áleýmettik medısınalyq kómek mekemeleri dep atalady. Mundaı mekemelerge baqylaý júrgizý kezinde eń aldymen bir aı buryn habarlama jiberiledi. Sodan keıin ǵana baqylaýshylar arnaıy barady. Sol kezde olar eshqandaı kemshilikter tappaıdy, biraq rezonanstyq oqıǵalar bolyp turady. Bala ólimine qatysty oqıǵalar da boldy. Osyndaı jaǵdaılardy boldyrmas úshin biz arnaıy habarlamasyz, eskertýsiz baryp memlekettik baqylaýdy engizýdi usynyp otyrmyz. Sondaı-aq arnaıy áleýmettik qyzmetter kórsetetin uıymdarǵa, balalarǵa bilim berý jáne saýyqtyrý qyzmetterin mindetti lısenzııalaýdy usynamyz», dep jaýap berdi ol.
