О́ńirlik tótenshe jaǵdaılar departamenti tótenshe jaǵdaılardyń aldyn alý basqarmasynyń bastyǵy Shakır Ahmetovtiń aıtýynsha, negizgi qaýip Baıanaýyl aýdanynda týyndaýy múmkin.
«Qaraǵandy oblysynyń aýmaǵyndaǵy Aqjar, Qaratoqa bógetterinen sý mol keletin bolsa, Ashysý ózeni tasyp, jolaı birneshe eldi mekenge qaýip tóndirýi múmkin. Jalpy, Baıanaýyl boıynsha 17 aýylda sý tasý qaýpi bar. Topyraqtyń tońdanýy boıynsha Ýspen, Sharbaqty aýdandarynda alańdaýshylyq bar, keıbir jerlerde eki metr tereńdikke deıin muz qatqan. Kóktemde qar jyldam erıtin bolsa, eldi mekenderdi mol sý basýy múmkin. Sondyqtan oıpań jerlerde ornalasqan aýyldar mańynda topyraq úıindilerin turǵyzyp jatyrmyz. 26 myń dana qum toltyrylǵan qapshyq, 37 myń tonna ınertti materıal, 120 tonna janar-jaǵarmaı qoryn daıyndap qoıdyq. Tótenshe jaǵdaılarǵa jedel den qoıý úshin 1 702 adam, 616 birlik tehnıka, 42 júzý quraly jáne 198 motopompalar daıyn. Halyqty evakýasııalaýdyń 43 pýnkti ázirlendi. Bıylǵy qys basynan eldi mekenderden 636 myń tekshe metrden asa qar shyǵaryldy, 10 naýryzǵa deıin 1 475 sý ótkizý qubyryn ashý josparlanyp otyr», deıdi ol.
Al «QazAvtoJol» UK» AQ Pavlodar oblysy boıynsha fılıal dırektorynyń orynbasary Alekseı Logvınenkonyń dereginshe, óńirdiń respýblıkalyq joldarynda sý basýy yqtımal tórt ýchaske bar. Olar Baıanaýyl, Ertis, Maı aýdandary aýmaǵynda ornalasqan. Jazǵyturym qar kúrt erise, keıbir joldyń ústimen qyzyl sý júrip ótýi múmkin.
Negizgi qaýip Qalqaman – Baıanaýyl – Úmitker – Botaqara avtojolyndaǵy eki ýchaskege tónýi ǵajap emes. Ásirese 231-shi shaqyrymy osal dep tanylyp otyr.
«Bul jerde sý ótkizetin eki tıýbıngti jáne bir temirbetondy qubyr ornalasqan. Biraq avtojoldyń ózi oıpań jerde. Jazǵyturym saı-salamen júgiretin sý kóp jınalsa, joldyń ústimen júrip ótetini anyq. Sondyqtan bizdiń kásiporyn qyzmetkerleri ol jerge iri jáne qıyrshyq tas, qum toltyrylǵan qaptar, ózge de ınertti materıaldardy daıyndap qoıdy. Ekinshi ýchaske – 100–105-shi shaqyrym aralyǵy. Ol jerge eki jáne úsh aralyqty úlken kópirler salynǵan. Mundaǵy asfaltty jol da oıpańmen ótedi. Ashysý ózeni arqyly aǵyl-tegil aǵatyn sý qatty jaıylsa, jolǵa shyǵyp ketýi yqtımal», dep eskertti maman.
Úshinshi qaýipti ýchaske – Atameken – Ertis – Rýsskaıa polıana baǵytyndaǵy respýblıkalyq joldyń Reseımen shekaralas tusyndaǵy 5,8 shaqyrymdyq aınalma jol. Negizgi avtojol jóndeýge jabylǵandyqtan, 2022 jyly aınalma jol salynǵan. Byltyr sý ótkizetin qurylystardyń jetkiliksizdiginen aınalma joldyń bir bóligin sý basyp, bıiktetilgen jerdi jyryp ótken. «QazAvtoJol» kúshimen byltyr 11 sý ótkizetin qubyr tóselipti. Biraq bıyl Ertis aýdanynda qardyń mólsheri óte kóp ekenin eskersek, bul qurylystardyń tótennen keletin mol sýǵa tótep bere alatynyna kúmán mol.
Sońǵysy – Atameken – Kóktóbe – Úlken Aqjar – Kýrchatov avtojolynyń 213-shaqyrymy. 2018 jyly kóktemde dál janynan ótetin temirjoldyń úlken sý qubyry kenetten ashylǵanda, lap qoıǵan sý kólik jolyn basyp qalǵan. Bıyl da sol jaǵdaı qaıtalanýy múmkin.
О́ńirlik jumyldyrý daıyndyǵy jáne azamattyq qorǵaý basqarmasynyń basshysy Qanat Kárimovtiń dereginshe, jalpy oblys aýmaǵyndaǵy barlyq avtojolda 1 279 sý ótkizetin qurylys bar. Olar jergilikti atqarýshy bıliktiń kúshimen 10 naýryzǵa deıin qardan arshylyp, daıyn turýy kerek. Jalpy, qys basynan oblys aýmaǵynda ortasha alǵanda 96 mm qar túsken. Keıbir jerde, máselen, Ertis, Jelezın aýdandarynda ylǵaldyń asa mol qory baıqalyp otyr.
«Qazgıdromet» óńirlik fılıalynyń bólim basshysy Oksana Ovsıannıkovanyń oıynsha, qar sýynyń jerge sińýi baıaý júrýi múmkin. Sınoptıkterdiń konsýltatıvtik boljamyna súıensek, naýryz aıy Pavlodar oblysynda qubylmaly bolady. Naýryzdyń úshinshi onkúndiginde qar men jańbyr aralas borandy kúnder jıi bolýy múmkin. Al sáýir men mamyr aıynda aýa temperatýrasy ádettegiden 1–2 gradýsqa joǵary bolady degen boljam bar.
Pavlodar oblysy
