Aýrýhana qurylysynyń bitpes daýy

Alty qabat aýrýhana ǵıma­ratyn jóndeýden ótkizýge 2020 jyly «Jumyspen qamtýdyń jol kartasy» baǵdarlamasy aıasynda respýblıka bıýdjetinen 1 mlrd 204 mln teńge bólingen. Qomaqty qarjynyń 920 mln teńgesi ıgerilgenimen, qalǵan qar­jy jumysty aıaqtaýǵa jetpeı qalǵan. Munyń sońy daý-da­maıǵa ulasyp, aqyry merdiger shet­tetilip, emdeý mekemesiniń bas­shysy jumystan ketip tyn­ǵan.

Taıaýda oblystyq máslıhat depýtattary emdeý mekemesin jóndeýge bıýdjetten qosymsha 1,5 mlrd teńge bólý týraly usy­nysty maquldady. Sol-aq eken, balalar aýrýhanasy tóńiregindegi daý taǵy ýshyqty. Sebebi ótken tamyz aıynda oblystyq balalar aýrýhanasynyń basshysy kúrdeli jóndeý jumystarynyń 20 pa­ıyzy bitpeı tur dep málimdegen. Al oblystyq densaýlyq saq­taý basqarmasynyń basshysy Danııar Jandaev taıaýda ǵana BAQ ókilderimen kezdesip, bu­ryn­ǵy merdigerdiń jumystyń oryn­dalýy týraly qujatty ótkizbegenin, sondyqtan ǵıma­ratqa júrgizilgen jóndeý jumys­tarynyń sapasy men deńgeıin anyqtaýǵa biraz ýaqyt ketkenin aıtty. Basqarma basshysynyń aıtýynsha, burynǵy tapsyrys berýshi men merdigerdiń tehnıkalyq qujattamasy bol­maǵan. Sonyń saldarynan saraptama jumysy da jyldan asa ýaqytqa sozylyp ketken.

Basqarma basshysy: «Bu­ryn­ǵy merdiger jóndeý ju­mys­taryn osydan úsh jyl bu­ryn júrgizdi. Sondyqtan ǵı­ma­­rattyń jóndeýden ótken keı­bir jerlerin qaıtadan jón­deý­den ótkizýimiz múmkin. Qazir aýrý­hanaǵa júrgizilýge tıis jón­deý jumystarynyń 50 paıyzy bit­peı tur. Muny aıaqtaý úshin 1,5 mlrd teńge qarjy kerek. Munyń syrtynda 2020 jyldyń esebimen alatyn bolsaq, 1 mlrd 200 mln teńgege baǵalanǵan kúr­deli jóndeýdiń 50 paıyzy shamamen 500 mln teńge bolady. Úsh jyldyń ishinde qurylys materıaldarynyń baǵasy 2,5-3 ese ósip ketti. Osyny eskersek, qazir 500 mln 1,5 mlrd teńgege baryp qalady», degen.

Alaıda burynǵy merdiger «Vershına» seriktestiginiń zańgeri Talǵat Hamıtov oblys­tyq densaýlyq saqtaý basqar­masynyń basshysynyń jalǵan málimet berip otyrǵanyn, osy ar­qyly jýrnalıster men óńir bas­shylyǵyn adastyryp otyr­ǵanyn aıtady. Zańgerdiń aıtýynsha, ǵımarattaǵy jóndeý jumystarynyń 95 paıyzy bi­tip tur. Al atqarylǵan jumys­tar­dyń somasy 1,8 mlrd teńge bolady.

«Joǵarǵy sottyń qaýlysyn­da «Vershına» seriktestigi jumys aýqymynyń 95 paıyzdan astamyn oryndady», dep anyq jazylǵan. Oryndalmaǵany – 5-aq paıyz. Oǵan ári ketkende 60 mln teńge qajet. Basqarma basshysy 1,5 mlrd degendi qaıdan alyp otyrǵanyn túsinbeımin. Bizdiń seriktestik erteń-aq jumysqa kirisýge daıyn. Ruqsat berse, 300 mln teńgeden asyrmaı kúrdeli jóndeýdi aıaqtap shyǵa alatynymyzdy resmı túrde málimdeımin», deıdi T.Hamıtov.

Osydan keıin aımaq basshysy Qumar Aqsaqalov máslı­hat sheshimin ýaqytsha toqta­typ, máseleniń mán-jaıyn anyq­taý úshin arnaıy komıssııa qurylatynyn málimdedi. Qos taraptyń talap-tilegin tyńdap shyqqan ákim tıisti oryndarǵa aýrý­hanany jóndeý jumystaryn aıaqtaýǵa qajetti qarajatty kim, qalaı eseptegenin tekserýdi min­dettep, jaǵdaıdy jan-jaqty zertteý úshin arnaıy jumys tobyn qurý týraly ókim shyǵardy.

Oblys ákimi jumys tobyn ti­keleı ózi basqardy. Top qu­ra­myna jergilikti atqarýshy bılik ókilderinen tys oblys prokýratýrasy, sybaılas jem­qorlyqqa qarsy qyzmet, eko­nomıkalyq tergeý departamenti, memlekettik ishki aýdıt departa­mentiniń ókilderi jáne merdiger kompanııanyń basshysy kiredi. Jumys tobynyń músheleri óz qu­zy­reti aıasynda máseleni zerde­lep, usynystar engizedi. Másele­niń túıini qashan sheshiletinin qazirshe eshkim dóp basyp aıta almaıdy. Al úlkender bir mámi­lege kelgenshe naýqas balalar burynǵy ınfeksııalyq orta­lyqty panalaı turady.

Qostanaı oblysy