Sýretti túsirgen – Erlan OMAR, «EQ»
Mı tamyrlarynyń anevrızmasyna óte bilikti, tájirıbesi tolysqan mamandar ǵana operasııa jasaı alady. Sebebi bul zamanaýı medısınalyq jabdyqtardy qajet etetin eń kúrdeli hırýrgııalyq aralasýlardyń biri sanalady. Mamandardyń aıtýynsha, mundaı kúrdeli operasııalar aqyly túrde júrgizilse, onyń quny shamamen 10 mln teńgeden asady eken. Naýqas operasııaǵa kvota boıynsha kelip, hırýrgter mindetti áleýmettik medısınalyq saqtandyrý aıasynda operasııany tegin jasaǵan.
Temirtaýdan kelgen pasıenttiń aıtýynsha, 2023 jyldyń jazynan beri basy qatty aýyryp, kórýi álsirep, sol kózdegi qozǵalystyń shektelýi mazalaǵan. Sondaı-aq joǵary qabaǵy túsip ketipti. Dárigerler MRT jáne selektıvti serebraldy angıografııaǵa túsirip, pasıentte mıdyń kóptegen anevrızmalaryn, sol jaq ishki uıqy arterııasynyń kavernozdy-paraklınoıdty segmentiniń 50,3-48,2 mm kólemdegi fýzıformdy anevrızmasyn, oń jaq ishki uıqy beziniń paraklınoıdty segmenti arterııalarııalarynyń 16,5-14,5 mm kólemdegi kezdeısoq fýzıformdy anevrızmasyn anyqtaǵan.
О́te kólemdi anevrızma bar pasıenttiń klınıkalyq jáne nevrologııalyq statýsyn eskergende, anevrızmanyń jarylý qaýpi óte joǵary bolypty. Sondaı-aq anevrızmanyń embolızasııasy kezinde tamyrdyń okklıýzııasynyń qaýpi joǵary edi. Konsılıým kezinde osynyń barlyǵyn qaperge alǵan Ulttyq neırohırýrgııa ortalyǵynyń Tamyrly jáne fýnksıonaldy neırohırýrgııa bólimshesiniń dárigerleri operasııany eki kezeńde júrgizý týraly sheshim qabyldaıdy.
Operasııanyń birinshi kezeńi byltyr qarashada ótken. Ol kezde dárigerler sol jaq ortańǵy mı arterııalarynyń frontaldy jáne parıetaldy tarmaqtary men M3-M4 segmentteri arasynda protektıvti ekstrakranıaldy mıkrovaskýlıarlyq anastomoz júrgizgen. Bul – sol jaq ishki uıqy arterııasyn mıkro spıralmen óshirýdiń rentgendik-tamyrly ádisi. Operasııadan keıin pasıenttiń joǵary qabaǵynyń túsińkiregeni (ptoz) qaıtyp, nevrologııalyq statýs jaqsarǵan.
Birneshe kún buryn pasıentke operasııanyń ekinshi kezeńi – oń jaq ishki karotıd arterııasynyń paraklınoıdty segmentiniń fýzıformdy anevrızmasynyń rentgendik endovaskýlıarlyq embolızasııasy teleskopııalyq aǵyndy qaıta baǵyttaýshy stentterdi qoldaný arqyly júrgizildi.
Pasıent qazir ózin áldeqaıda jaqsy sezinedi. Operasııa nátıjesine rıza.
– Maǵan operasııa jasaǵan barlyq dárigerge alǵys aıtamyn. Qaraǵandyda maǵan operasııa jasalmady. Jaǵdaıym aýyr bolǵan soń osy ortalyqqa jiberdi. Men osy jerde em qabyldaǵanyma rızamyn. Qazir bári jaqsy. MÁMS júıesiniń arqasynda barlyq emshara, tekserý-zertteýler, operasııa tegin jasaldy. Bárine alǵysym sheksiz, – deıdi pasıent Naqypbek Danbaev.
Operasııany Tamyrly jáne fýnksıonaldy neırohırýrgııa bólimshesiniń jetekshi neırohırýrg dárigeri Shyńǵys Nurımanov jasaǵan. Neırohırýrg dáriger Sh.Nurımanovtyń aıtýynsha, kóp jaǵdaıda anevrızma baıqalmaıdy. Ári adam kez kelgen ýaqytta ólip ketýi múmkin ekenin bilmeı, jyldar boıy ómir súre alady eken.
– Anevrızma jarylǵanǵa deıin adam qolaısyzdyq pen mazasyzdyq belgilerin sezinbeıdi. Sondyqtan aýrýdy erte satysynda anyqtaý úshin adam kem degende bir ret MSKT, ıaǵnı mýltıspıraldy kompıýterlik tomografııa jasatý qajet, – dep keńes aıtty neırohırýrg-dáriger.
Mı tamyrlarynyń anevrızmasyna operasııa jasaý mamandardyń joǵary biliktiligin jáne zamanaýı medısınalyq jabdyqty qajet etetin eń kúrdeli hırýrgııalyq aralasýlardyń biri sanalatynyn aıttyq. Bul kún saıyn MÁMS sheńberinde jasalyp jatqan kúrdeli operasııalardyń biri ǵana.
