Qostanaı men Tobyl qalasyn jalǵap jatqan kópir kútpegen jerden jabylyp, tártip saqshylary qalaǵa kirip-shyǵyp jatqan avtokólikterdi toqtatyp, jappaı teksere bastaǵan.
Kóp keshikpeı Tobyl qalasynda qylmys jasaǵan kúdiktiniń izdestirilip jatqanyn habarlaǵan PD baspasóz ortalyǵy turǵyndardan jol ústindegi jedel-izdestirý sharalaryna sabyrlyq tanytyp, túsinistikpen qaraýdy jáne tek resmı aqparatqa ǵana senýdi suraǵan.
Kóp uzamaı qarýly qaraqshylyq jasaǵan er adam ustaldy. Kúdikti qazir qamaýda otyr degen habar aldyq. Oblystyq polısııa departamenti baspasóz qyzmetiniń málimetinshe, kúdikti 24 aqpanda tapa tal túste Tobyl qalasyndaǵy metall qabyldaý pýnktteriniń birin tonap ketken. Jumys basynda otyrǵan adamdardy qarýmen qorqytyp, kassada jatqan 792 myń teńgeni alyp, iz sýytqan.
Jurttyń az ýaqyt ábigerge túsýiniń sebebi osy. Polısııa arnaıy uıymdastyrylǵan jedel izdestirý is-sharalary aıasynda avtokólikterdi de jappaı teksergen. Bulaı etpese, taǵy bolmaıdy, kúdikti ári-beri aǵylyp jatqan kóliktiń kez kelgen bireýine minip ketýi múmkin.
«Biz kúdiktini Rýdnyı qalasynda ustadyq. Tapansha, aqsha, balaklavaǵa, ıaǵnı betbúrkemesi bar baskıimge uqsas zatty tárkiledik. Qazir qajetti tergeý amaldary júrgizilip jatyr. Tárkilenip alynǵan qarýǵa arnaıy saraptama taǵaıyndaldy», dedi PD Krımınaldyq polısııa basqarmasynyń basshysy Iýrıı Polıýhov.
Kúdiktiniń múlki tárkilenip, 5 jyldan 10 jylǵa deıin bas bostandyǵynan aıyrylýy múmkin. Polısııa departamenti senbi kúni týyndaǵan jol qolaısyzdyǵyna túsinistikpen qaraǵan turǵyndarǵa alǵys bildiredi.
Qostanaı oblysy
