Sýretti túsirgen – Erlan OMAR, «EQ»
Beıbitshilik pen tatýlyq – adamzattyń asyl qundylyqtarynyń biri. Adam balasy búkil sanaly ǵumyrynda únemi tynyshtyqta, máńgilik beıbit ómir súrýdi arman etedi. Alys-jaqyn ult-ulystarmen, aǵaıyn-týyspen, kórshi-qońsymen tatý-tátti, beıbit ómir súrýge umtylý – qazaq halqynyń qanyna sińgen qasıetteriniń biri. «Syrt kóz – synshy» degen, arǵy-bergi zamanda qazaq jerinde bolǵan saıahatshylar, ǵalymdar, elshiler qazaq ultynyń meımandos, qonaqjaı, keńpeıil, eshkimge jamandyq oılamaıtyn, qaskóılikten ada halyq ekenin, óz betinshe eshkimge urynbaǵan, soǵys ashpaǵan el ekenin súısine jazǵan.
Tarlan tarıhtyń taǵylymdy tustary az emes. Ushy-qıyrsyz qazaq dalasy san ǵasyrlar sorabynda ózine san alýan órkenıet pen mádenıetti sińirdi. Búgingi Qazaqstan – ozyq, jasampaz rýhanı jáne mádenı dástúrlerdiń murageri.
Aǵaıyn arasynda aýyzbirlik pen syılastyq saltanat qursa ǵana qyzmet óristi, eńbek jemisti bolatyny beseneden belgili. El birligi – barsha demokratııalyq, zaıyrly, quqyqtyq jáne áleýmettik memleket qurýdyń aınymas sharty. Memlekettiń ekonomıkalyq ósip-órkendeýi, áleýmettik ilgerileýi, demokratııalyq damýy qoǵam birligi kelisken jaǵdaıda ǵana júzege asady. Sol turǵyda el kóleminde beıbitshilik pen aýyzbirlikti kózdiń qarashyǵyndaı saqtap, ony ári qaraı nyǵaıta berý – basty maqsatymyz.
Búgingi tańdaǵy elimizde qalyptasqan etnostar tutastyǵy men halyqtar dostyǵy arqasynda kósegemiz kógerip, egemen elimiz ornyqty damý jolyna tústi. El ishindegi ultaralyq tatýlyqty nyǵaıtýda konstıtýsııalyq organ bolyp sanalatyn Qazaqstan halqy Assambleıasynyń orny aıryqsha ekenin atap ótken jón. Assambleıa – beıbitshilik pen kelisimdi tıimdi nasıhattaýshy qoǵamdyq ınstıtýtqa, etnosaralyq jáne konfessııaaralyq toleranttylyqtyń otandyq úlgisiniń negizine aınaldy.
Elimizdiń halyqaralyq túrli qaýipsizdik sharalaryna belsene qatysýy, bastamashy bolýy, tóraǵalyq etýi, sondaı mazmundaǵy túrli forým, konferensııalardyń Astanada turaqty ótýi – Memleket basshysy Qasym-Jomart Toqaevtyń konstıtýsııalyq negizde júrgizip otyrǵan salıqaly saıasatynyń aıqyn kórinisi. Ultaralyq kelisimdi qalyptastyrý, konfessııaaralyq dıalogti jalǵastyrý úshin jaǵdaılar jasaý – memlekettiń buljymas strategııalyq baǵdary. Al bul baǵdar – halyqtar men dinder arasyndaǵy bir-birine degen senim men yntymaqtastyń arta túsýi úshin altyn kópir.
Dúnıe dúrbeleńge túsip jatqan qazirgideı kezeńde birligimizdiń beriktigi ǵana baıandy bolashaqqa bastaıtynyna kózimiz jetti. Qazaqstannyń halqy ózgeler qyzyqtaı qaraıtyn tynyshtyq pen turaqtylyqtyń jemisin kórip otyr. Osy rette árbir otandasymyzǵa artylar jaýapkershilik zor.
Qarǵa tamyrly halqymyzdy, qazaq baıtaǵyn qasıetti qarashańyraqqa balasaq, elimizdegi barsha etnos – sol shańyraqqa shanshylǵan ýyqtar. Osynyń ózi etnosaralyq kelisim men dostyq qatynastyń qanshalyqty mańyzdy ekenin kórsetedi. Sondyqtan qoǵamda, árbir otbasynda kelisim mádenıeti men beıbitshilik qaǵıdattaryn berik ornyqtyra berý kerek.
Qazaqstandaǵy etnosaralyq qatynastardyń álemdik qaýymdastyq tarapynan moıyndalýy – eń aldymen, qazaq ultynyń jaýapkershiligindegi jetistik. Eldiń ekonomıkalyq ósý, áleýmettik ıgilik pen demokratııa – ulttyń tutastyǵy men berekesimen keletin jetistik.
Alǵys aıtý kúni – aǵa býynǵa, ata-anaǵa, ustazdarǵa, syılas, syrlas, taǵdyrlas izgi jandarǵa qurmet kórsetetin, barlyqqa, tirlikke táýbe aıtatyn tamasha mereke.
Kóktemniń alǵashqy ataýly kúni izgi isterge negizdelgen qoǵam qalyptastyrýǵa, júıeli reformalardy naqty júzege asyrýǵa tyń serpin beredi. Jer irgesi aman, el ishi tynysh bolsyn dep tileıik. Halqymyz bereke-birliginen, yrys-yntymaǵynan aıyrylmasyn.
