Bıyl 2023-2025 jyldarǵa arnalǵan «Birtutas tárbıe baǵdarlamasy» júzege asa bastady. Shalqar qalasyndaǵy №8 orta mektepte ulttyq jádigerler kórmesiniń ashylýy atalǵan baǵdarlamanyń sharapaty deýge bolady. Tarıh qoınaýynan syr shertetin kóne buıymdar kórmesiniń ashylýy joǵary deńgeıde ótti. Oǵan mektep ujymy men ata-analar qazaqy kıim kıip kelip, is-sharanyń rýhanı deńgeıin arttyrdy. Kımeshek kıgen ájelerimiz shashý shashyp, aqsaqaldarymyz ata dástúrdi ardaqtaǵan bul baıandy bastamaǵa rızashylyǵyn bildirip, batasyn berdi. Oqýshylar qol kúrestirip, asyq oınap, dástúrli sporttyq oıyndardan kórinis kórsetti.
Kórmeniń ashylý lentasyn Shalqar qalalyq ardagerler uıymynyń tóraǵasy Amankeldi Qalybaev pen aq jaýlyqty ana Bazargúl Syrǵabekova qıdy.
– Jas urpaqty ádepti de sanaly, arly da abyroıly etip tárbıeleý úshin eń aldymen ádet-ǵurpymyzdy, dástúrli dinimizdi, ata-babalarymyzdan qalǵan muralardy olardyń sanalaryna sińire bilýimiz qajet. Bul kórme mektep ujymy men ata-analar qaýymynyń belsendiligimen az ýaqyttyń ishinde jasaqtaldy, alda mundaǵy jádigerler qatary tolyǵatynyna senemin. Osy kórme zalynda ótetin qosymsha sabaqtarda ár synyp oqýshylary ulttyq qundylyqtarǵa tereń boılap, rýhanı turǵydan da zeıinderi artady. Sanany san myńdaǵan aqparat alańdatqan búgingideı jahandaný kezeńinde jastardy rýhty etip eseıtý úshin olardy ata joldan alshaqtatpaı, salt-dástúr negizderimen sýsyndatqan abzal. Mektebimizde ata-analardy pedagogıkalyq qoldaý kabıneti de jumys isteıdi. Onyń maqsaty – balalardy oqytý jáne tárbıeleý boıynsha ata-analarmen qarym-qatynasty kúsheıtý, sondaı-aq berekeli otbasy mádenıetin damytý, – deıdi №8 orta mekteptiń dırektory Rıta Basmaǵanbetova.
Zamanaýı mektep ǵımaratynyń bir buryshynan qazaqy kıiz úı pishininde jasaqtalǵan kórmege qoıylǵan abaja, abdyra, aǵash tósek, adalbaqan, asadal, jozy, sandyq, kebeje syndy baıyrǵy úı jıhazdarynyń túp tarıhyn mektep muǵalimi Mánshúk Mapýtova tııanaqty tanystyrdy.
85 jastaǵy Dúısenbaı Eshmuhanov aqsaqal munda qoıylǵan árbir jádigerdiń ózine ystyq kórinetinin aıtyp, jastyq shaǵyn, buǵanasy bekimeı aýyr eńbek júgin arqalaǵan zamandastaryn esine aldy. Osy bilim oshaǵynyń jas ustazy, «Qazaqstan» ulttyq arnasyndaǵy «Mergender mekeni» realıtı shoýynyń júldegeri, mergen qyz Sándigúl Álenova
sadaq atý óneriniń tól mádenıetimizdegi ornyn, asyl dinimizdegi mergendik jaıly qasıetti sózderdi aıta kele, jastardy osy ónerge kóbirek tartý jóninde oı-pikirin ortaǵa saldy.Respýblıkalyq deńgeıdegi mergender saıysynda oq boıy ozyp shyqqan Sándigúl – mektebindegi maqtaýly ustazdardyń biri.
Is-shara barysynda mekteptiń daryndy oqýshylary óz ónerlerin pash etip, meımandar mereıin ústem etti. Kezinde «100 mektep, 100 aýrýhana» memlekettik baǵdarlamasymen salynǵan №8 orta mektebi – aýdanymyzdaǵy kórnekti bilim oshaqtarynyń biri. Munda qazir ár aptanyń dúısenbisi «Ulttyq tárbıe» kúni bolyp belgilengen. Bul kúni ustazdar men oqýshylar mektepke qazaqy naqyshtaǵy kıimmen keledi. Úzilis qońyraýlary dástúrli kúı áýenimen soǵylyp, ulttyq oıyndar oınalatyn osy kúndi oqýshylar da asyǵa kútedi eken.
Muhtar MYRZALIN
Aqtóbe oblysy,
Shalqar qalasy
