Foto: Aýyl sharýashylyǵy mınıstrliginiń baspasóz qyzmeti
Delegasııa Jańaarqa aýdanyna baryp, mán-jaıdy anyqtady: 2023 jyldyń jeltoqsany men 2024 jyldyń aqpan aıynda qardyń qalyń túsýinen ári temperatýranyń tómendeýinen jáne jaıylymdarǵa muz qatýyna baılanysty jylqylardyń tebindeýi qıynǵa soqqan. Soǵan baılanysty taılar men kári jylqylar qyrylyp qalǵan. Aýyl sharýashylyǵy janýarlaryn sáıkestendirý bazasynyń dereginshe qazirgi ýaqytta aýdanda 84,3 myń bas jylqy tirkelgen.
Mınıstrliktiń habarlamasy boıynsha Jańaarqa kenti men Qarajal qalasy arasyndaǵy avtojol boıynan óleksesi tabylǵan 23 bas jylqynyń sáıkestendirý nómiri bolmaı shyqqan. О́lekseler mal qorymyna jetkizildi. Sonymen qatar atalǵan aýdanda sáıkestendirý nómiri joq taǵy 44 bas jylqy tabylǵan. Osylaısha, jaıylymda ólgen 67 bas jylqynyń ıelerin anyqtaý múmkin bolmaǵan. Aýdandyq veterınarlyq stansııalarǵa jylqylardyń ólimine qatysty ıelerinen áli resmı túrde ótinish túspegen.
«Ulytaý oblysynda 2000 bas jáne Jańaarqa aýdanynda qolda bar mal basynyń jartysy qyrylyp qaldy degen aqparat shyndyqqa janaspaıdy», delingen habarlamada.
Qazirgi ýaqytta aýyldyq veterınarlyq dárigerlerdiń, jergilikti atqarýshy organ ókilderiniń, memlekettik veterınarlyq-sanıtarlyq ınspektorlardyń qatysýymen ólgen jylqylardy jınaý jáne olardyń ólekselerin joıý jumystary júrgizilip jatyr. Bul jaǵdaı AShM Veterınarlyq baqylaý jáne qadaǵalaý komıtetiniń Ulytaý oblysyndaǵy aýdandyq aýmaqtyq ınspeksııalarynyń qadaǵalaýynda bolady.
