Keshe Argentınanyń Týkýman qalasynda «Chelendjer» týrnıri aıaqtaldy. Aınaldyrǵan eki aı aralyǵynda AQSh-tyń Sanraız, Palm-Koýst jáne Neıplsindegi jarystarda qarsylas shaq keltirmegen Dmıtrıı Popko Ońtústik Amerıkada da ózin jaqsy qyrynan kórsetti. Bastapqy básekelerde kort qojaıyny Gonsalo Zeıtýne, perýlyq Pedro Iаmachkın, bolıvııalyq Hýan Karlos Prado Anhelodan basym túsken ol jartylaı fınalda taǵy bir jergilikti tennısshi Federıko Agýstın Gomesti jolynan yǵystyrdy. Aqtyq synda otandasymyz brazılııalyq Pedro Sakamotomen saıysqa tústi.
Taǵy bir qýanyshty jańalyq, elimizdiń birinshi raketkasy Aleksandr Býblık osy aptada jańartylǵan álemdik reıtıngte úsh satyǵa joǵarylap, 20-oryndy ıelendi. Qazaqstannyń erler quramasynyń birde-bir múshesi dál osyndaı dárejege jetpegen. Kezinde halyqaralyq arenada jap-jaqsy óner kórsetken Andreı Golýbev 2010 jyldyń qońyr kúzinde 33 jáne Aleksandr Kýkýshkın 2019 jyldyń aqpanynda 39-oryndy enshiledi. Jetken jerimiz osy ǵana edi. Aqyry olardyń barlyǵynan Aleksandr Býblık ozdy. Kúni keshe ǵana ol óziniń sporttyq mansabynda tuńǵysh ret TOP-20 oıynshynyń qataryna qosyldy.
Elimizdiń eń úzdik tennısshisi jaıynda qysqasha aqparat bersek, Aleksandr 1997 jyldyń 17 shildesinde Reseıdiń Lenıngrad oblysyna qarasty Gatchına qalasynda dúnıege keldi. Alǵashynda Sankt-Peterbýrg pen Máskeýde sheberligin shyńdap, jastar býyny arasynda eleýli tabystarǵa qol jetkizdi. Biraq jergilikti tennıs federasııasy tarapynan tıisti qoldaý kórsetilmegendikten, 2016 jyly Qazaqstan azamattyǵyn aldy. Sol kezden beri ol Monpeledegi ATR týrnırinde eki márte (2022, 2024 jyldary) Galle (2023) men Antverpendegi (2003) týrnırlerde top jardy. Nıýport (2019, 2022), Chendý (2019), Antalıa (2021), Sıngapýr (2021) jáne Meste (2022) uıymdastyrylǵan dúbirli dodalardyń fınalynda oınady. Byltyr Ýımbldonnyń tórtinshi kezeńine deıin jetti. Bul – Býblıktiń «Úlken dýylǵa» sanatyndaǵy jarystardaǵy eń úzdik kórsetkishi.
