Indıan-Ýellstegi jarys óziniń máni men mańyzy, mártebesi men dárejesi jáne júlde qorynyń mólsheri jaǵynan «Úlken dýlyǵa» sanatyndaǵy saıystardan ǵana qalyp qoıady. 1974 jyldan beri úzdiksiz uıymdastyrylyp kele jatqan osy týrnırde álemniń eń úzdik tennısshileri únemi óner kórsetýde. Jarty ǵasyr ýaqyt aralyǵynda erler arasyndaǵy básekede eń kóp oljaǵa kenelgen Shveısarııanyń maqtanyshy Rodjer Federer (2004-2006, 2013-2014, 2017 jyldary) men Serbııanyń sańlaǵy Novak Djokovıch (2008, 2011, 2014-2016). Olar bes retten top jardy. Áıelder saıysynda birde-bir oıynshyǵa úsh márte top jarý baqyty buıyrmady. Ataqtary alysqa jaıylǵan Martına Navratılova (1990–1991), Merı Djo Fernandes (1993, 1995), Lındas Devenport (1997, 2000), Serena Ýılıams (1999, 2001), Kım Kleısters (2003, 2005), Danıela Gantýhova (2002, 2007), Marııa Sharapova (2006, 2013) jáne Vıktorııa Azarenko (2012, 2016) syndy burymdylar bas júldeni eki retten ǵana oljalady.
Byltyrǵy jarysta kúlli álem jurtshylyǵy Qazaqstannyń birinshi raketkasy Elena Rybakınanyń asqan sheberligine tánti boldy. Amerıkalyq Sofııa Kenın, ıspanııalyq Paýla Badosa, reseılik Varvara Gracheva, chehııalyq Karolına Mýhova, polshalyq Igva Sventek jáne belarýstik Arına Sobolenkoǵa san soqtyrǵan jerlesimiz teńdessiz dep tanyldy. Erlerdiń aıqasy Karlos Alkarastyń jeńisimen aıaqtaldy. Ispanııanyń asa daryndy tennısshisi aqtyq synda reseılik Danııl Medvedevti utty.
Bıylǵy jarystyń alǵashqy aınalymynda bos bolǵan Elena Rybakına (№4) ekinshi kezeńde Nadıa Podoroskamen (№84) kezdesýge tıis edi. Alaıda dál oıyn bolatyn kúni Elenanyń densaýlyǵy syr berip, ol kortqa shyqpady. Iýlııa Pýtınseva (№79) tusaýkeser kezdesýin germanııalyq Tamara Korpachqa (№76) qarsy ótkizdi. Bul oıynda otandasymyz nemis qyzyn ońaı utty – 6:2, 6:3. Kelesi kezeńde otandasymyz WTA reıtınginde ózinen áldeqaıda joǵary turǵan reseılik Ekaterına Aleksandrovadan (№16) aılasyn asyrdy – 7:6, 6:1. Iýlııa endi amerıkalyq Medıson Kızpen (№18) kúsh synasady.
Erlerdiń týrnırinde de jaǵdaı dál solaı. Aleksandr Býblık (№20) jarysty ekinshi kezeńnen bastap, qytaılyq Szıýnchen Shanǵa (№139) shań qaptyrdy – 6:4, 6:1. Úshinshi aınalymda jerlesimiz TOP-10 oıynshynyń qataryna engen Aýstralııanyń ókili Aleks de Mınormen aıqasady. Al Aleksandr Shevchenko (№45) úshin bul týrnır aıaqtaldy. Germanııanyń tennısshisi Domınık Kepferdi (№49) qapy qaldyrdy – 6:3, 1:6, 7:6. Biraq kóp uzamaı ol Argentınanyń oıynshysy Fransısko Serýndoloǵa (№22) jol berdi. Ekinshi sette esep 1:3-ke jetkende Shevchenko básekeni jalǵastyrýdan bas tartty. Sóıtip, jarys jolynda eki jerlesimiz ǵana qaldy.
