Elimizdiń erler quramasynyń bas bapkeri Myrzaǵalı Aıtjanov Apennın túbegine úzdik alty shákirtin apardy. Solardyń arasynan tek 63,5 kg salmaqtaǵy Muhamedsabyr Bazarbaıulynyń joly bolmady. Byltyr ǵana ulttyq komandanyń sapyna engen daryndy jas ekinshi kezeńde bolgarııalyq Rodoslav Rosenovqa ese jiberdi. Al talaı synaqtan múdirmeı ótip, birqatar baıraqty básekede olja salǵan bes sportshymyz shırek fınalǵa súrinbeı jetti.
92 kg salmaqtaǵy Aıbek Oralbaı AQSh boksshysy Djamar Tallımen kúsh synasty. Bul básekede qandasymyz kúmánsiz jeńiske jetti. 51 kg salmaq dárejesinde baq synaǵan Sáken Bıbosynov ulybrıtanııalyq Kırıan Makdonaldpen kezdesti. Jekpe-jekti óte jaqsy bastaǵan qandasymyz úshinshi raýndta qatty soqqy jiberip aldy. Tóreshi nokdaýn belgiledi. Biraq dereý esin jıǵan saqa sportshymyz kózdegen maqsatyna qol jetkizdi.
57 kg salmaq dárejesinde Mahmud Sabyrhan men Asror Vohıdov sheberlik baıqasty. Osy tájik jigiti 2011 jyly Astanada ótken jasóspirimder arasyndaǵy álem chempıonatynda bas júldeni oljalaǵan edi. Odan keıin Asror dúbirli dodada daralana almady. Ol Azııa oıyndary men álem chempıonatyna birneshe márte qatyssa da, jeńis tuǵyryna kóterile almady. Bul joly da dál solaı boldy. Apennın túbegindegi aıqasta Mahmud óziniń myqtylyǵyn moıyndatty.
71 kg salmaq dárejesinde Aslan Shymbergenov ázerbaıjandyq Sarhan Álıevpen aıqasty. Komanda kapıtanyna tán minez kórsetken Aslanbektiń myqtylyǵy esh kúmán týǵyzǵan joq. 80 kg salmaqtaǵy Nurbek Oralbaı ırlandııalyq Kelın Kessıdımen kúsh synasty. Bul básekede qandasymyzǵa biraz ter tógýge týra keldi. Biraq ol da jeńiske jetip, josparyn júzege asyrdy. Nátıjesinde, Býsto-Arsısıodan elimizdiń boksshylary bes lısenzııamen oraldy.
Taǵy bir erekshe toqtala ketetin jaıt, Asqar Erkebaevtyń qos shákirti – Aıbek pen Nurbek Oralbaı birer aıdan keıin Fransııanyń astanasynda alaýy tutanatyn ǵalamdyq dodada óner kórsetedi. Elimizdiń jekpe-jek túrleri tarıhynda bir shańyraqtan shyqqan aǵaıyndy sportshylarǵa buryn-sońdy ondaı baq buıyrmaǵan edi. Mine, endi bul kúnderi Astananyń turǵyny – Rahat Oralbaıdyń egiz uldary Parıj Olımpıadasynda kúsh synasý qurmetine ıe boldy. Sondaı-aq Parıjge baratyndar qatarynda 63,5 kg salmaqtaǵy Rýslan Abdýllaev ta bar. О́zbekstannyń týy astynda óner kórsetip júrgen qazaq jigiti shırek fınalda serbııalyq Alekseı Sendrıkke san soqtyrdy. Al asa aýyr salmaqta Qytaıdyń namysyn qorǵaǵan Danabek Baıqonys norvegııalyq Omar Muhammed Shınadan utylyp, kózdegen maqsatyna qol jetkize almady.
Áıelder arasynda 75 kg salmaq dárejesinde synǵa túsken ulybrıtanııalyq Sındı Ngama bizdiń Valentına Halzovany ońdyrmaı sabady. Báseke barysynda tóreshi úsh ret nokdaýn belgiledi. Úshinshi raýndta báseke toqtatyldy. Tehnıkalyq nokaýt! 50 kg salmaqtaǵy Alýa Balqybekova germanııalyq Karına Maksı Kleıserge jol berdi. Osylaısha, bizdiń qyzdar Italııadaǵy jarystan quralaqan oraldy.
