Bastapqy básekelerde germanııalyq Tamara Korpach (№76) pen reseılik Ekaterına Aleksandrovadan (№16) aılasyn asyrǵan Iýlııa Pýtınseva (№79) úshinshi kezeńde Medıson Kızben (№18) kúsh synasty. Kezinde álemdik reıtıngte jetinshi orynǵa deıin kóterilgen 29 jastaǵy AQSh-tyń ókili US Open dodasynyń (2017 jyly) fınalynda jáne Aýstralııanyń ashyq birinshiligi (2015, 2022) men Rolan Garrostyń (2018) jartylaı fınalynda óner kórsetti. Sondaı-aq Kız WTA týrnırlerinde jeti ret top jardy. Desek te bul kúni de babynda bolǵan Iýlııa qarsylasyna esh múmkindik bermeı, jarqyn jeńiske qol jetkizdi – 6:4, 6:1.
Tórtinshi kezeńde Pýtınsevanyń joly álemniń birinshi raketkasy Iga Shventekpen qıysty. 22 jastaǵy Polshanyń maqtanyshy Rolan Garrosta úsh márte top jaryp, AQSh-tyń ashyq birinshiligin bir ret utqan. WTA sanatyndaǵy 18 týrnırde bas júldeni oljalady. Bul tartysta Shventek shashasyna shań juqtyrmady – 1:6, 2:6.
Atalǵan týrnırde taǵy eki jerlesimiz baq synaǵan edi. Aleksandr Shevchenko (№51) ekinshi kezeńde argentınalyq Fransısko Serendýlodan (№22) utylsa, Aleksandr Býblık (№20) úshinshi aınalymda TOP-10 tennısshiniń qataryndaǵy aýstralııalyq Aleks de Mınorǵa (№10) ese jiberdi. Al jarysty ekinshi kezeńnen bastaýǵa tıis Elena Rybakına (№4) densaýlyǵynyń syr berýine baılanysty kortqa shyqpady.
