Foto: akorda.kz
Sóz basynda Qasym-Jomart Toqaev quryltaı músheleri men barsha qazaq halqyn Kórisý kúnimen quttyqtady.
«Eń aldymen, men barshańyzǵa Kórisý kúni qutty bolsyn degim keledi. Qystan aman-esen shyqqan týǵan-týys, aǵaıyn bir-birimen qaýyshyp jatyr. El arasynda Kórisý kúni elimizdiń batys aımaǵyna tán mereke degen túsinik bar. Biraq bul qazaqtyń kóneden kele jatqan dástúri ekenin umytpaýymyz kerek. Sondyqtan biz tutas el bolyp, Naýryz meıramyn osy kúnnen, ıaǵnı Kórisý kúninen bastap toılaǵanymyz jarasymdy bolary sózsiz», dedi Prezıdent.
Memleket basshysynyń aıtýynsha, jyl saıyn ótetin dástúrli Ulttyq quryltaı bıyl Ramazan aıy men Naýryz meıramymen tuspa-tus kelip tur.
«Bıyl Ulystyń uly kúni qasıetti Oraza aıynyń alǵashqy kúnderimen tuspa-tus kelip otyr. Ulttyq Quryltaı da Áz Naýryz qarsańynda ótip jatyr. Ulystyń uly kúni tabıǵat pen tutas tirshilik jańarady. Al Quryltaıda qoǵamdyq qundylyqtardy jańǵyrtý úshin mańyzdy qadamdar jasalady. Jańarý men jańǵyrý jaqsylyqqa jol ashady. Sondyqtan Quryltaı músheleriniń jylyna bir ret alqaly jıynda bas qosýy ıgi dástúrge aınaldy.
Alǵashqy otyrys Ult uıasy Ulytaý jerinde ótse, byltyr kıeli Túrkistanda jınaldyq. Búgin taǵy bir tarıhı ólke – Atyraý oblysyna kelip otyrmyz. Úshinshi otyrystyń Jaıyq jaǵasynda ótip jatqany tegin emes. Áıgili Saraıshyq qalasy osy jerge tıip tur. Bul shahar Ulyq ulystyń, keıin Qazaq handyǵynyń mańyzdy ákimshilik jáne saýda ortalyǵy bolǵany tarıhtan belgili»», dedi Qasym-Jomart Toqaev.
