«Qys mezgilinen keıin nashar jóndelgen joldardyń kemshin tustary kórine bastady.
Jaýapty basqarma jol jumysshylarmen birge jóndeletin kóshelerdiń uzaqqa shydaýyn qamtamasyz etýi kerek. Jumys minsiz, laıyqty kúıde jáne syn kóteretin deńgeıde oryndalýy kerek. Elordany aralaý barysynda qalanyń barlyq aýdanyna baryp, bıylǵa arnalǵan josparlaryn belgiledik. Bıyl jol jóndeý jumysy erterek bastalady. Uzyndyǵy 60 km bolatyn 50-den astam kósheni jóndeýdi josparlap otyrmyz. Sol sııaqty 20-dan astam iri nysan bar. Olardyń bir bóligin bıyl aıaqtaımyz, taǵy bir bóliginiń (kósheler, jol aıryqtary, kópirler jáne t.b.) qurylysyn bıyl bastaımyz.
Sondaı-aq trotýarlardy, áleýmettik nysandarǵa kireberis joldardy, aıaldama qaltarystaryn, pandýstardy jáne t.b. jabdyqtaýdy josparlap otyrmyz.
Eń aldymen kólik kóp júretin, jańa áleýmettik nysandar (kirme joldar) bar oryndarda, sonymen qatar eldi mekenderde joldar jóndelip, salynady. Qurylys jumysy qarqyndy júrip jatqan aýdandarǵa toqtalar bolsam, onda ınjenerlik ınfraqurylym men turǵyn úılerdiń qurylysy aıaqtalǵannan keıin ǵana joldar salynady; oǵan deıin jaýapty basqarma ýaqytsha tósemmen qamtamasyz etýi kerek. Sondaı-aq qazir kommýnaldyq qyzmetter sý tasqynyna qarsy belsendi jumys júrgizip jatyr: qar shyǵarý, kollektorlardy, naýa-aryq jelisin, baqylaý jáne jańbyr qabyldaý qudyqtaryn tazalaý jáne t.b.,» deıdi Jeńis Qasymbek.
