Foto: Aqorda
Astana qalasynyń ákimi barlyq negizgi ekonomıkalyq kórsetkishter boıynsha oń dınamıka baıqalatynyn aıtty. Byltyr tartylǵan ınvestısııa kólemi 1,6 trıllıon teńgeni qurady. О́ńdeý ónerkásibi, bilim, medısına, logıstıka, kólik jáne basqa da salalarda iske asyrylǵan jobalardyń nátıjesinde 1,8 myń jumys orny ashyldy.
О́tken jyly JOLTAP jobasy aıasynda 6 myńǵa jýyq azamat jumysqa ornalasty. Al bıyl jumyspen qamtylatyn azamattardyń sanyn 2 ese ulǵaıtý, ıaǵnı 12 myń adamnan asyrý josparlanyp otyr. Jalpy 2024 jyly 58 myńǵa jýyq jumys ornyn ashý kózdelgen.
Sonymen qatar Prezıdentke jylytý maýsymynyń barysy týraly da baıandaldy. Byltyr kúzde «Ońtústik-Shyǵys» gaz jylý stansııasyn, «Turan» gaz jylý stansııasynyń birinshi kezegin jáne úshinshi JEO-ny iske qosý nátıjesinde jylý qala boıynsha uzaq ýaqyttan beri alǵash ret artyǵymen berilip jatyr. Elordanyń tynys-tirshiligin qamtamasyz etetin bul nysandardyń qýaty – saǵatyna 1140 gıgakalorııa.
Memleket basshysyna bıyl «Telman» gaz jylý stansııasynyń birinshi kezegi jáne «Turan» gaz jylý stansııasynyń ekinshi kezegi, úshinshi JEO-nyń kómirmen jylytylatyn bóliginiń iske qosylatyny týraly málimet berildi. Bul nysandar qalany qosymsha 600 Gkal/saǵat jylý qýatymen qamtamasyz etedi.
Budan bólek, Jeńis Qasymbek áleýmettik nysandardyń (mektepter, oqýshylar saraılary, balabaqshalar, medısınalyq ortalyqtar, jeńildikpen beriletin turǵyn úıler) qurylysy, apatty jaǵdaıdaǵy eski úılerdi súrý, qurylysy uzaqqa sozylǵan nysandardy salyp bitirý, turǵyn úı alaptaryn damytý, qalany abattandyrý jáne kógaldandyrý jumystary týraly aıtty.
Prezıdent Qasym-Jomart Toqaev elordany odan ári damytý jóninde birqatar tapsyrma berdi.
