Kóziqaraqty jankúıerler bul esimdi jaqsy biledi. HH ǵasyrdyń bel ortasynda asa aýyr salmaq dárejesinde atoı salǵan Baltyq jaǵalaýynyń alyby Eýropa chempıonatynyń eki jáne KSRO birinshiliginiń alty dúrkin chempıony atandy. KSRO halyqtary Spartakıadasynda bas júldeni oljalap, basqa da asa iri dodalarda daralandy. Sol kezderi onyń joly qazaqtyń dańqty boksshysy Ábdisalan Nurmahanovpen birneshe márte qıysty. Birde ol jeńdi, birde Ábekeńniń asyǵy alshysynan tústi. Bylǵary qolǵabyn shegege ilgennen keıin Shosıkas Lıtva boksshylaryn jattyqtyrdy, Odaq quramasynyń bas bapkeriniń kómekshisi boldy. 2012 jyldyń kúzinde Algırdas Shosıkas 85 jasqa qaraǵan shaǵynda jaryq dúnıemen qosh aıtysty.
Kaýnastaǵy týrnırde Qazaqstannyń toǵyz bylǵary qolǵap sheberi fınalǵa shyǵyp, solardyń arasynan altaýy altyn tuǵyrǵa kóterildi. Aqtyq saıysta Asyljan Serikbaı (57 kg) men Farýh Toqtasynov (71 kg) ýkraınalyq Denıs Rozdolskı men Maksımom Molodandy, Elnur Súıinbaı (67 kg) men Azamat Bektas (75 kg) polshalyq Kırıll Globenko men Mıhal Iаrlınskıdi jáne Tursynbaı Qulahmet (80 kg) ulybrıtanııalyq Ramtın Musany utty. Jandos Qydyralıevtiń (63,5 kg) qarsylasy ırlandııalyq Djon Pol Heıl jekpe-jekke shyǵýdan bas tartty. Al Nursultan Altynbek (54 kg), Almat Ábdýálı (60 kg) jáne Abzal Quttybekov (86 kg) sheshýshi tusta súrinip, kúmis medaldy qanaǵat tutsa, Danııal Sábıt (48 kg) pen Amanat Sabyrǵalı (+92 kg) qolaǵa qol sozdy.
