Qazaqstan musylmandary dinı basqarmasy Shymkent qalasy ókildiginde mundaı izgi amal – jyl saıyn árbir Oraza aıynda bolyp turatyn qaıyrymdy is-shara. Megapolıstiń bas ımamy Baǵdáýlet Ábdirahmanovtyń aıtýynsha, dinı basqarma jaǵdaıy tómen azamattarǵa, kópbalaly otbasylarǵa, múgedektigi bar jandarǵa qoldan kelgenshe kómektesip keledi.
«Kómekke muqtaj kisilerden suranarymyz, azyq-túlik qorjynyn qur alyp qoımaı, pitir sadaqasyn bergen qaıyrymdy jandarǵa da duǵa-tilekterin arnap qoısa eken. Islamda árdaıym alaǵan qoldan beregen qol joǵary turady. Bul jóninde ardaqty Paıǵambarymyz Muhammed ǵaleıhı salam da óz hadısinde aıtyp ótken. Osy oraıda biz de osy jerge alaqan jaıyp kelgen adamdardyń urpaǵynan keleshekte sadaqa alýshy emes, berýshi jandardyń shyǵýyn násip etýin Alladan shyn júrekten suraımyz», dedi B.Ábdirahmanov.
Bizge bergen suhbatynda ımam zeket malyn shyǵarýǵa shamasy keletin árbir adam pitir sadaqasyn berýge mindetti ekenin jetkizdi. Al shamasy kelmeıtin jandardyń pitir sadaqasy sharıǵat turǵysynan súnnet amal bop sanalady. Iаǵnı pitir úlestirip qaıyrymdylyq jasasa, saýap alady, bolmasa oǵan eshqandaı kúná jazylmaıdy. Ramazan aıynda eń birinshi qajet bolǵan jaqsy amal – osy pitir sadaqasy. Múmkin bolǵansha ár adam óziniń jaǵdaıy tómen týysqanyna, kórshi-qolań, jaqyn aralasatyn jandaryna kómek qolyn sozyp, syılyq usynǵany abzal.
Imamnyń aıtýynsha, búgingi tańda pitir sadaqasynyń quny eki kılo bıdaıdyń baǵasyna teń. Degenmen asyl sharıǵatymyzda ony azyq-túlik túrinde de taratýǵa bolady. Ol azyqqa arpa, bıdaı, qurma, meıiz kiredi. Otbasydaǵy árbir adamnyń atynan osy daqyldardyń shamamen 3 kılodaı mólsherinde jan sadaqasy, ıaǵnı pitir sadaqasy berilýi tıis. Sondyqtan sadaqany aqshalaı ǵana emes, azyq-túlik esebinde de berse, saýaby esh ózgermeıdi.
Sonymen birge zeket maly da qasıetti Oraza aıynda taratylsa, saýaby molyraq bolady. Al jalpy musylmanshylyqtaǵy bes paryzdyń birine kiretin bul sadaqa jyl on eki aı úlestiriledi. Balıǵat jasyna jetken, aqyl-esi bútin, dúnıe-múlki nısap mólsherine saı, ıaǵnı 85 gramm altynǵa teń qarajaty, aqshalaı eseptegende shamamen 1,4 mln teńgesi bolsa, mine osyndaı azamattarǵa zeket malyn shyǵarý paryz bolady. Aıtqandaı, bul mólsherdegi qarajat musylman jannyń ıeliginde, aınalymynda bir jyl boıy júrýi kerek. О́ıtkeni ımam málimdegendeı, búgingi tańda kópshilik azamattyń depozıtinde úı alýǵa salymdary bar. Eger olardyń basynda eshqandaı baspana bolmasa, zeket berý paryz bolmaıdy, kerisinshe qosymsha úı alýǵa áreket jasaǵan bolsa, zeket malyn ondaı kisilerge mindet bop júkteledi. Sondaı-aq Islamda tórt túlik maldyń da zeketi bar. Qyryq qoıdan bir qoı, 27 sıyrdan bir tana zeket malyna kiredi.
ShYMKENT
