Dittegen jerime jetken soń telefonǵa jazyp jón surastym. Selınograd aýdanynyń týmasy. Aty-jóni – Jomart Baıqoshqarov. Uzaq jyldardan beri Kókshetaý qalasynyń turǵyny. Kásibi – 2010 jyldan beri taksı júrgizýshisi. Oǵan deıin etikshi, kóshe sypyrýshy da bolǵan. Poıyzda júrip gazet-jýrnal da satypty. Kúnkóris qamy da. Otbasyn asyraý úshin. Qyzy boı jetip, turmysqa shyqqan, uly – 16-da. Qara qazan, sary balanyń qamy úshin janyn jaldap jumys istegende kóksegeni – solardyń qamy. Qatarynan kem qylmaı ósirsem degen izgi nıet, ákelik aq peıil. Qolynan keler jumystyń eshqaısysynan tartynyp kórgen emes. Taǵdyrdyń synaǵyna da kóndikken. Ym men ısharadan uqqanymyz, basqa túskenniń bárine emenniń ıir butaǵyndaı shydamdy bolýy kerek. Odan basqa ne istersiń?
Sálden soń telefon arqyly sýrdoaýdarmashysymen tildestik. Ym men ısharadan kóp táýir. Ádette jolaýshylar taksı qyzmetine ókpe-naz da aıtyp jatady eken. Kóptiń kóńilin kim tapqan?! Al Jomartqa shaǵym aıtylmapty.
Áleýmettik jelidegi taksı júrgizýshisi men jolaýshynyń arasyndaǵy kıkiljiń túsirilipti. Orta jastan asqan, pishimdi áıel júrgizýshiniń ıt terisin basyna qaptap jatyr. О́zi de adýyn adam eken, tipti údetip barady. Bir ǵana kórinisten bul jumystyń ońaı emes ekenin túsinýge bolady. Neshe qıly bolmys bar. Toıdan toıyp shyqqandar da, kimge soqtyǵaryn bilmeı júrgen sotqarlar da taksı shaqyrýy ábden múmkin ǵoı.
– Ákem jumysy qanshalyqty qıyn bolsa da, úıge kelgende qabaǵyn bir shytyp kórmepti, – deıdi qyzy Ásem. – О́tpeli kezeńniń ókpek jeli tońdyrǵanda saýda-sattyqpen de aınalysty. Tilsiz tirlik etý árıne, qıyn. Biraq sol taýqymettiń bárine biz úshin tózgenin jan-dúnıemizben sezemiz. Sondyqtan ákege degen qurmet sheksiz. Qaı ýaqytta bolsyn arqasúıer asqar taýdaı ákemizdiń bar ekenine ishteı shúkirshilik aıtyp, perzenttik paryzymyzdy óteýge tyrysyp júremiz.
Qyzynyń aıtýyna qaraǵanda, ákesi meılinshe ustamdy, otbasyna shýaq tógetin meıirim-shapaǵaty mol, ara-tura ádemi ázilimen de kóńilderin baýrap qoıatyny bar. Eń bastysy, jaryq kúnniń bir shókim sáýlesine degen móldir mahabbaty tóńirekke araı shashyp turady. Erteńgi kúnge degen senimine selkeý túsken emes. Eń bastysy da sol emes pe?!
Kókshetaý qalasy
