Buǵan deıin Prezıdent Qasym-Jomart Toqaev Qytaıdyń ásem Haınan aralynda ótip jatqan Boao forýmyna kelip, plenarlyq otyrysta qurmetti qonaq retinde sóz sóıledi. Forýmnyń taqyryby – «Azııa jáne álem: ortaq mindetter, ortaq jaýapkershilik».
Ádil Káýkenov atap ótkendeı, 2001 jyly Azııa daǵdarysynyń saldarlarymen kúresý úshin qurylǵan Boao forýmy 2010 jyldardyń ortasynan bastap aımaqtyq oqıǵadan jahandyq qubylysqa jyldam aýysa bastady, sondaı-aq oǵan beıresmı «Shyǵys Davosy» degen ataý berildi.
«Sonymen qatar búginde Azııa ekonomıkalyq ósý men ǵylymı-tehnıkalyq progrestiń negizgi draıveri, sondyqtan mynadaı suraq týyndaıdy: bolashaqta álemdik damý kún tártibin kim anyqtaıdy - Davos pa álde Boao ma? Rasynda, Qazaqstan Prezıdenti Qasym-Jomart Toqaev óz sózinde Azııanyń jaı ǵana ósý emes, naǵyz renessans dáýirin bastan keshirip jatqanyn atap ótti», dep jazdy saıasattanýshy Facebook paraqshasynda.
Káýkenov Qazaqstannyń syrtqy saıası jáne syrtqy ekonomıkalyq basymdyqtarynda azııalyq baǵyttyń basym bolýyn tańǵalarlyq jaıt dep sanamaıdy.
«Áıgili «Alısa ǵajaıyptar elinde» shyǵarmasynda oryndy sóz bar: «Tipti bir orynda turý úshin bar kúshińdi salyp júgirý kerek, al bir jerge jetý úshin eki ese jyldam júgirý kerek». Kem degende keıbir ambısııalary bar kez kelgen damýshy memlekettiń jaǵdaıyn dál osylaı sıpattaýǵa bolady. Al Azııa – óte qundy baǵdar jáne baǵyt, onymen baılanystardy nyǵaıtý barlyq álem memleketteri úshin mańyzdy mindet», dep qosty ol.
Káýkenovtyń paıymynsha, Qazaqstannyń Boao forýmyna qatysýy jalpyazııalyq damýdaǵy ambısııalary men múmkindikterin kórsetýge septigin tıgizbek.
«Aqyrynda, Qazaqstannyń jáne búkil Ortalyq Azııanyń basty máseleleriniń biri – bizdiń eldiń álemniń kóptegen elderi úshin, sonyń ishinde Azııa úshin áli kúnge deıin terra ınkognıta bolyp qalýy. Bul ınvestısııa tartýdy, tehnologııalar transfertin, taýarlardy syrtqy naryqqa shyǵarýdy jáne Qazaqstanda jańa joǵary tehnologııalyq óndiristerdi qurýdy qıyndatady.
Sondyqtan Boao forýmynda Qazaqstan Prezıdenti Qasym-Jomart Toqaevtyń «qurmetti qonaq» mártebesi Qazaqstannyń jáne jalpy Ortalyq Azııanyń kún tártibin ilgeriletýge, Qazaqstannyń jalpyazııalyq damýdaǵy ambısııalary men múmkindikterin kórsetýge septigin tıgizedi», dep qorytyndylady saıasattanýshy.
Eske salaıyq, Memleket basshysy Qytaıǵa jumys saparymen bardy. Onda ol Boao Azııa forýmynyń sessııasyna qatysty. Sapar baǵdarlamasyna Qazaqstan Prezıdenti men Qytaı Halyq Respýblıkasy basshylyǵynyń, halyqaralyq uıymdar men iri qytaılyq kompanııalar basshylarynyń birqatar kezdesýi kiredi.
Qyrmyzy JUMAǴALIQYZY,
EUÝ stýdenti
