Jaǵalaýda túsirilgen vıdeo áleýmettik jelide tarap jatyr. Kórsetilgen kadrlarǵa zer salsaq, ıtbalyqtardyń kózderine zaqym kelgenin baıqaýǵa bolady.
Mańǵystaý oblysy boıynsha balyq sharýashylyǵy ınspeksııasy basshysynyń mindetin atqarýshy Andreı Rýskıı arnaıy qurylǵan komıssııa jaǵalaýdy tekserip jatqanyn aıtty. Búgin, 29 naýryzda Ýrdıýk múıisi men Baýtınskaıa shuńqyrynan 40 ıtbalyq óleksesi tabyldy.
Mamandardyń aıtýynsha, ólekselerden fızıkalyq zaqym, jaralar nemese zorlyq-zombylyqtyń belgileri anyqtalǵan joq.
«Daýyldan keıin bizdiń mamandar teńiz jaǵalaýyn únemi tekserip otyrady. Itbalyqtar basqa jerde ólgen, qyrylý sebebin medısınalyq saraptama anyqtaıdy. Al olardyń kózderi ólgennen keıin zaqymdalsa kerek, buǵan qustar sebep bolýy múmkin», dep túsindirdi Rýskıı.
