foto: med.mcfr.kz
Úkimettiń málimetinshe, medısınalyq uıymdar kúsheıtilgen rejımde jumys istep jatyr.
«Dárigerler men jedel medısınalyq járdem brıgadalary qosymsha tartylady. Barlyq evakýasııalanǵandar dárigerlerdiń baqylaýynda, olardyń jaǵdaıy turaqty, qandaı da bir jaraqat alý týraly shaǵymdar túsken joq. Júkti áıelder men balalardyń jaǵdaıyna baqylaý júrgiziledi. Bosaný ýaqyty taıaǵan áıelder aýdandyq jáne oblystyq ortalyqtarǵa kóshirildi», dep jazylǵan habarlamada.
Sonymen qatar Densaýlyq saqtaý mınıstrliginde jaǵdaıdyń kúndelikti monıtorıngi júrgizilip jatyr. Sý tasqynynan zardap shekken óńirlerdiń turǵyndary úshin medısınalyq jáne psıhologııalyq kómektiń qosymsha brıgadalaryn ashý úshin qyzmetterdiń daıyndyǵy qamtamasyz etildi.
«Halyqty ýaqytsha jınaý pýnktterinde táýlik boıǵy medısınalyq posttardyń jumysy qamtamasyz etildi, dárilik zattar men medısınalyq buıymdardyń qajetti qorlary daıyndaldy. Barlyq óńirlerde sanıtarııalyq-epıdemıologııalyq ahýaldy baqylaý jáne monıtorıng kúsheıtildi. Sonymen qatar jergilikti jerlerde densaýlyq saqtaý máseleleri boıynsha baılanys ortalyqtarynyń jumysy biryńǵaı algorıtmmen táýlik boıy jumys isteý rejımine aýystyryldy», dep habarlady Úkimettiń baspasóz qyzmetinen.
Sý tasqynynan zardap shekken óńirler turǵyndary densaýlyq saqtaý basqarmalarynyń Call-ortalyqtary boıynsha kelesi nómirlerge júgine alady:
Aqtóbe oblysy (+7 (7132) 41 02 13)
Qostanaı oblysy (+7 (7142) 52 40 70)
Batys Qazaqstan oblysy (+7 (7112) 24 00 06)
Qaraǵandy oblysy (+7 (7212) 95 55 59)
Abaı oblysy (+7 (7222) 56 64 50)
Ulytaý oblysy (+7(7102) 99 95 09)
Aqmola oblysy (109)
