Oblys ákiminiń orynbasary Baqytjan Baıahmetov bastaǵan arnaıy jumys toby áýeli Kúrshim, Ulan jáne Marqakól aýdandaryndaǵy bógetter men ózenderge áýeden baqylaý júrgizdi. Ulan aýdanynyń kishi bógetterinde artylǵan sý birtindep aǵyzylyp jatyr. Sondyqtan ózenderdegi sý deńgeıi kóterilýi múmkin. Biraq Ulan aýdanynyń aýyldaryna tasqyn sýdyń qaýpi tónip turǵan joq.
Áýeden baqylaý jumystary kezinde Marqakól aýdanynyń Jıdeli aýlyndaǵy joldarǵa sý jaıylǵany baıqaldy. Munda qutqarýshylar men jergilikti atqarýshy organ ókilderiniń kúshimen sý basqan ýchaskeler tekserilip jatyr.
Al Úlken Naryn aýdanynda kún raıynyń kúrt jylynýyna baılanysty kommýnaldyq qyzmet te kúsheıtilgen jumys rejimine kóshken. Qazirgi tańda kommýnaldyq qyzmetter sýdy sorǵyzyp, sýaǵarlar men aryqtardy tazartyp jatyr. Jumysqa arnaıy tehnıkalar da jumyldyrylǵan.
Esterińizge sala ketsek, 29 naýryzda kún kúrt jylynǵan. Ol az bolǵandaı, túnimen jańbyr jaýǵan. Saldarynan erigen qar sýynyń deńgeıi 20–25 sm-ge deıin kóterilip, Úlken Naryn aýdanynyń ortalyǵy Úlken Naryn aýlynda 11 úıdiń, Altynbel aýlynda 10 úıdiń aýlasyna qarǵyn sý jaıylǵan. Jaǵdaıdy turaqtandyrýǵa baǵyttalǵan jumystar toqtaýsyz júrgizilip, tóngen qaýiptiń beti qaıtqandaı boldy. Jeke turǵyn úılerdiń aýlalaryna kirgen qar sýy tolyqtaı motopompa arqyly sorylyp, ózen arnasyna qaraı baǵyttaldy. Sonymen qatar «Qazavtojol» qyzmetkerleri Úlken Naryn men Katonqaraǵaı aýyldary aralyǵyndaǵy jolǵa bóget jasap, asfalt betine shyqqan sýdyń mólsherin azaıtty. Deı turǵanmen, qos aýdandy baılanystyratyn tasjoldyń betine taýdan aqqan erigen qar sýy shyǵyp ketýi áli de múmkin. Onyń aldyn alý úshin arnaıy tehnıka jumyldyrylyp, «Qazavtojol» qyzmetkerleri ınertti materıalmen bóget jasaý jumystaryn júrgizdi.
«Qazir turǵyn úılerdiń aýmaǵyna sý jaıylyp ketpes úshin ınertti materıalmen aryqtyń mańaıyna bóget jasalyp jatyr. Aýylda 10 úıdiń aýlasyna sý kirgen edi. Jumyldyrylǵan kúshtiń nátıjesinde sý shyǵaryldy. Jaǵdaı tolyqtaı baqylaýda», dedi E.Baırahmetov.
Kúrshim aýdanyn tikushaqpen aınalyp ótken oblys ákimdigi ókilderi men qutqarýshylar aýdanda sý basý qaýpi joq ekenin aıtady. Topterek aýlynyń tusyndaǵy kópirdi sý shaıyp ketti degeni bolmasa, jaǵdaı turaqty. Irgedegi Qara Ertis ózenderindegi sý deńgeıi normaǵa sáıkes ekenine kóz jetkizgen mamandar Marqakól aýdanyn aınalyp ótti. Aıta keteıik, Marqanyń taýly aımaqtaryndaǵy Tósqaıyń, Balyqtybulaq, Shanaǵaty aýyldaryndaǵy qalyń qardyń kóbesi sógile qoıǵan joq.
Aıta keteıik, «Qajservıs» JShS ShQO boıynsha fılıalynyń dırektory Erkin Daýmovtyń sózinshe, qazir oblystaǵy respýblıkalyq mańyzy bar tasjoldardaǵy jaǵdaı da qalypty.
«Qazirgi jaǵdaı boıynsha oblysqa qarasty respýblıkalyq mańyzy bar avtojoldarda 26 birlik arnaıy tehnıka men 30 qyzmetker jumys istep júr. Jol boıyna sý shyǵý qaýpi joq», dep atap ótti E.Daýmov.
Iá, resmı derekterge sensek, qaýip joq. Laıym solaı bolsyn. ShQO ákiminiń orynbasary Baqytjan Baıahmetov pen oblystyq TJD bastyǵy Erǵalı Bahaev bastaǵan jumys toby óńirge qarasty Kúrshim, Samar, Marqakól, Úlken Naryn aýdandaryndaǵy jaǵdaıdy áýeden baqylap qaıtqanda da, tilsiz jaýdan tóngen qaýiptiń joq ekenin tilge tıek etti.
«Áýeden barlaý barysynda jaǵdaı turaqty ekeni baıqaldy. Qara Ertis ózeninde muzdyń jarylýyna baılanysty sý óz aǵysymen ketip jatyr. Úlken Naryn aýlyna baılanysty jergilikti atqarýshy organdarmen, TJD mamandary tıisti jumystardy atqaryp jatyr. Oblys boıynsha jaǵdaı kúndelikti baqylaýda. Qaýip bar degen jerlerde kezekshilik qoıylǵan. Olar táýlik boıy qadaǵalap otyr», dedi B.Baıahmetov.
«Qajservıs» JShS ShQO boıynsha fılıalynyń dırektory E.Daýmov jol ústine qar sýynyń jaıylýynan qaýip joq degenimen, Samar aýdanyndaǵy Qaraótkel aýlynan 6 shaqyrym jerdegi Kókjota – Qaraótkel avtojolyna qarǵyn sý jaıyldy. Oǵan jańbyr men erigen qar sýy sebep. Qarǵyn sý jolǵa jaıylyp, 125 adam Qaraótkel aýlynda qalǵan. Esep-qısapqa júginsek, Qaraótkel aýlynda barlyǵy 37 jer úı bar. Tasqyn qaýpi úılerge tónip turǵan joq.
«Jol jabynyn arshyp, sý burý jumystary júrgizilip jatyr. Eldi mekenderdi sý basý qaýpi joq. Jergilikti atqarýshy organdardan 10 adam men 6 tehnıka, tótenshe jaǵdaı departamentinen 2 qutqarýshy maman men 1 tehnıka, sondaı-aq aýdandyq polısııa bóliminen 2 adam men 1 tehnıka jumyldyryldy», dep habarlady Samar aýdandyq ishki saıasat bólimi.
Kóktemgi tabıǵattyń tosyn minez kórsetip turǵany – ázirshe osy. Osymen qaýip beti qaıtsa degen el tilegi bar.
Shyǵys Qazaqstan oblysy
