Bastapqy básekelerde portýgalııalyq Rakel Brıto men reseılik Krıstına Dýdınadan basym túsken Ábıba Ábýjaqynova shırek fınalda álem birinshiligi men Panamerıka oıyndarynyń qola júldegeri, qurlyq chempıony amerıkalyq Marı Selııa Labordeni súrindirdi. Jartylaı fınalda jerlesimizdiń joly japonııalyq Nasýmı Sýnodamen qıysty. Sońǵy úsh álemdik dodada qarsylas shaq keltirmeı, eki birdeı Azıadada aldyna jan salmaǵan ákki balýanǵa Ábıbanyń áli jetpedi. Sodan keıin Eýropa birinshiliginde eki ret úzdik úshtikti túıindegen Reseıdiń saqa sportshysy Sabına Gılıazovany san soqtyrǵan Ábýjaqynova qola medaldy ıelendi. Rasynda da, qandaı jarysqa qatyssa da, únemi júldegerler sanatynan kórinip júrgen qazaqtyń qarshadaı qyzyna alǵystan basqa aıtarymyz joq. Ázirge bar úmitimiz – Ábıba ǵana. О́kinishke qaraı, ózge dzıýdoshylardyń jankúıerlerdi qýantyp júrgen kezderi sırek. Jastardy aıtpaǵanda, saqa sportshylardyń ózi halyqaralyq dodalarda ala-qula óner kórsetip júr. Olardyń jeńiske degen jigeri men qulshynysy kemip bara jatqandaı. Al Olımpııa oıyndarynyń alaýy tutanýǵa az ǵana ýaqyt qaldy. Tórtkúl dúnıeniń teńdessizderi bas qosatyn ǵalamdyq doda qarsańynda oryn alǵan osy jaǵdaı jankúıerlerdi alańdatyp otyr.
Taıaýda ǵana Tbılısıdegi týrnırde top jaryp, álemdik reıtıngte birden alty satyǵa joǵarylaǵan Nurqanat Serikbaev (60 kg) Anadoly elindegi jarystyń tusaýkeser kezdesýinde mońǵolııalyq Sogt-Ochır Bıambadjavpen beldesýi kerek edi. Biraq ol belgisiz sebepterge baılanysty tatamıge shyqpady. Áıtpegende Nurqanattyń óz salmaǵyndaǵy TOP-10 dzıýdoshynyń qataryna qosylýyna tamasha múmkindigi bolǵan edi. Biraq bul joly qandasymyzǵa ondaı baq buıyrmady.
Al Dıana Býrkeeva (48 kg), Tolǵanaı Ábeýova (52 kg), Baqyt Qusaqbaeva (57 kg), Ǵusman Qyrǵyzbaev (66 kg), Danııar Shamshaev (73 kg), Abylaıhan Jubanazar (81 kg), Samalaı Erǵalıeva men Gúlnur Bahanova (63 kg), Ekaterına Tokareva (70 kg), Margarıta Grısenko men Arýna Jangeldına (78 kg), Aqerke Ramazanova men Mádına Paragýlgova (+78 kg) Ermahan Ánýarbekov (90 kg), Nurlyhan Sharhan men Ádilet Saparǵalıev (100 kg) jáne Ǵalymjan Qyryqbaı men Erasyl Qajybaev (+100 kg) alǵashqy aınalymdarda súrindi.
