foto: aktobetimes.kz
Aqtóbe oblystyq sotynyń baspasóz qyzmeti habarlaǵandaı, qylmystyq ister jónindegi mamandandyrylǵan aýdanaralyq sotynda páterge zańsyz kirip úıdi tonaǵan, sonymen qatar eki adamdy óltirip, kishkentaı qyzdy óltirýge oqtaldy degen aıyp taǵylǵan marqumǵa qatysty (192-babynyń 3-bóligi, 4-tarmaǵy, 99-babynyń 2-bóligi, 1,14-tarmaqtary, 24-babynyń 3-bóligi, 99-babynyń 3-bóligi) is qaraldy.
Sotta anyqtalǵandaı, sottalýshy E. 2023 jylǵy 28 naýryzda túnde mas kúıinde velosıpedpen úılerdiń biriniń janynan ótip bara jatyp, ekinshi qabattaǵy páterdiń balkonynyń ashyq turǵan esigin baıqaǵan.
«Sottalýshy gaz qubyry arqyly páterdi tonaý maqsatynda ekinshi qabattaǵy úıge kirgen, biraq aqsha men baǵaly zattardy tappaǵan. Páter ıesi sybdyrdan oıanǵan kezde qylmysker ony birneshe ret denesiniń ár jerinen pyshaqtap ketken. Keıin anasynyń aıqaıynan oıanǵan ulyn da pyshaqtaǵan. Alǵan jaraqattarynyń saldarynan anasy men uly oqıǵa ornynda qaıtys boldy.
Osy kezde balalar bólmesinde uıyqtap jatqan kishkentaı qyz dybystardan oıanyp, jerde jatqan aǵasynyń máıitin jáne qylmyskerdi kóredi. E. atty sottalýshy kishkentaı qyzdy kórip, úıde taǵy bireý bar ma dep suraıdy. Keıin qyzdy eki qolymen tunshyqtyryp, moınyna birneshe ret pyshaqpen soqqy jasaıdy. Sol sátte qyz esinen tanyp qalady. E., onyń boıynda tirshilik belgileriniń joqtyǵyna kóz jetkizip, qyzdy óldi dep oılap, oqıǵa ornynan boı tasalaǵan», dep sotta asa aýyr qylmystyń jaı-japsary aıtyldy.
Al qosarlanǵan kisi óltirdi degen kúdikti ustalǵan soń qamaýǵa alynǵan tergeý ızolıatorynda qaıtys bolǵan.
Qorǵaýshy tarap sottan aıyptalýshynyń kinási is materıaldarymen dáleldenbegendikten, sotqa deıingi tergep-tekserý zań buzýshylyqtarmen júrgizilgendikten aqtaýshy negizder boıynsha isti toqtatýdy surady.
«Prokýror aıyptaýdy qoldap, sottan marqum E.-ny jaza taǵaıyndamaı, kináli dep tanýyn surady. E.-niń kinási sotta zerttelgen dáleldemelerdiń jıyntyǵymen, onyń ishinde E.-niń óziniń kinásin moıyndaý týraly aıǵaqtarymen, oqıǵa ornynda kóshedegi beınebaqylaý kameralarynyń jazbalary, bazalyq stansııadaǵy abonenttik nómirlerdiń taldaýy, saraptamalyq zertteýler, tiri qalǵan jas qyzdyń aıǵaqtary tekserý jáne naqtylaýmen dáleldendi. Sot úkimimen marqum E., jaza taǵaıyndalmaı, qylmys jasaǵany úshin kináli dep tanyldy. Sot úkimi zańdy kúshine engen joq», dep habarlady Aqtóbe oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
Sonymen qatar sot Aqtóbe oblysynyń IIB bastyǵy men prokýroryna qatysty sotqa deıingi tergep-tekserý barysynda jiberilgen zań buzýshylyqtar boıynsha jeke qaýly shyǵardy.
