Foto: istockphoto.com
Oblystyq aýyl sharýashylyǵy jáne jer qatynastary basqarmasy mal shyǵynyn eseptep jatyr. Búgingi tańda tizimde 3 myńǵa jýyq iri qara bar.
«Biz kún saıyn aýdandardan jedel aqparat jınaımyz. Búginde 3000-ǵa jýyq mal ólgeni belgili boldy. Olardyń basym bóligi Oıyl jáne Qobdy aýdandarynda tirkelgen. Biraq olar Baıǵanın, Yrǵyz óńirinde de bar. Bul kórsetkish aldaǵy kúnderi naqtylanady. Bul rette malshylardyń úıleri men qoralarynyń qulaǵany týraly derekter jınalyp jatyr», deıdi Aqtóbe oblystyq aýyl sharýashylyǵy jáne jer qatynastary basqarmasynyń bólim basshysy Panabek Bımuratov.
Onyń aıtýynsha, aýdan, aýyldyń mal dárigerleri úılerdi, sharýa qojalyqtaryn aralap, tirkeý jumystaryn júrgizý ústinde.
«Osydan keıin naryqtaǵy ár maldyń ortasha quny anyqtalyp, shyǵyn óteledi. Bul bir kúnniń emes, birneshe aıdyń jumysy. Málimetter kún saıyn jańartylyp, Aýyl sharýashylyǵy mınıstrligine jiberiledi. Fermerlerdiń nesıeleri men sýbsıdııalanatyn tehnıkaǵa qatysty máseleler de qarastyrylady», dep qosty Panabek Bımuratov.
