Qalaı alyp qarasaq ta, qarǵyn sýdan kez kelgen ýaqytta qaýip tónýi bek múmkin. Muny jergilikti atqarýshy bılik te tolyqtaı sezinip otyr. Oblystyq tótenshe jaǵdaılar departamentiniń basshysy Arman Toqanovtyń aıtýynsha, sý tasqyny qaýpiniń aldyn alý maqsatynda barlyq jerde táýlik boıy kezekshilik uıymdastyrylyp jatyr. Mamandar jaǵdaıdy tolyqqandy zerdelep júr. Jaýapty tulǵalar sý qoımalarynyń qanshalyqty tolǵanyn jan-jaqty qarap, kúndelikti monıtorıng jasap otyr.
Departament basshysy keltirgen derekke júginsek, óńirde halyqty qabyldaýǵa arnalǵan 396 pýnkt ázirlengen eken. Jaǵdaıdy tolyqqandy baqylaýda ustaý maqsatynda 1 459 adam, 364 tehnıka, 135 sý aıdaý quraly jáne 19 júzý quraly bar arnaıy toptar jasaqtalǵan.
О́ńir basshysy Erbol Qarashókeev te óńirdegi jaǵdaıǵa jiti nazar aýdaryp otyr.
– Prezıdent sý tasqynyna qarsy jumysty kúsheıtý, azamattardyń qaýipsizdigin qamtamasyz etý boıynsha naqty mindet júktep otyr. Jergilikti atqarýshy bılik ókilderi qarap qalmaıtyny anyq. Biz naqty is-qımyl josparyn quryp, kez kelgen jaǵdaıǵa, qaýip tónse jedel áreket etýge tas-túıin daıyn bolýymyz kerek. Basty maqsat – adam qaýipsizdigi. О́ńirdegi barlyq aýdan ákimderi men jaýapty basqarma basshylary sý qoımalary men ózge de nysandardyń jaı-kúıin udaıy nazarda ustaýy kerek. Sondaı-aq sý tasqynyna daıyndyqty ákimder udaıy tekserip otyrǵany abzal dep esepteımin. Mundaı kezeńde eldi dúrliktirýge bolmaıdy. Jalǵan aqparat bergen adamdardyń máselesi maıshammen qaralatynyn óńir turǵyndary qaperden shyǵarmaǵany durys. Ár maman óz isine muqııat bolyp, shynaıy aqparatpen bólisýi kerek», deıdi ákim.
О́ńirde sý tasqynyna qarsy daıyndyq jumysy jaýapty organ ókilderiniń basqosýy kezinde jan-jaqty pysyqtaldy. Oblys ortalyǵy Taraz qalasyndaǵy turǵyn alaptaryndaǵy barlyq kanal men aryq-atyzdyń tazalyǵy da kúndelikti baqylaýǵa alynǵan. Qala ákimdigi bul máselege aıryqsha den qoıyp otyr. Sý tasqyny qaýpi bar ýchaskelerde qajetti rezervter men mobıldi toptardy qalyptastyrý boıynsha da aıtarlyqtaı jumystar atqarylyp jatyr.
Oblys ákimi E.Qarashókeev Tarazdy qıyp ótetin, bastaýyn kórshi Qyrǵyz Respýblıkasynan alatyn Talas ózeniniń jaǵalaýyn nyǵaıtý jumystaryn tikeleı óz baqylaýyna alyp otyr. Taraz qalasy, Baızaq, Jambyl aýdandaryndaǵy birqatar eldi mekenniń qaýipsizdigi nazardan tys qalǵan joq. Aýdan men qala basshylaryna tıisti tapsyrmalar berilgen.
Qalaı desek te, jambyldyq mamandar qarǵyn sýdan tónetin qaýippen kúresýge daıyn. Jaýapty tulǵalar turǵyndardyń qaýipsizdigin qamtamasyz etý maqsatynda tıisti mindettemelerdi moınyna alyp otyr.
Jambyl oblysy
