Memleket basshysy Qasym-Jomart Toqaevtyń sý tasqynynan zardap shekkenderge kómek kórsetý týraly tapsyrmasymen Qarjy naryǵyn retteý jáne damytý agenttigi banktermen jáne mıkroqarjy uıymdarymen birlesip, zardap shekken azamattardy, shaǵyn jáne orta bıznes sýbektilerin qoldaý sharalaryn júrgizetin boldy. Bul úshin jergilikti atqarýshy organdardyń tizimine sáıkes, sý tasqynynan zardap shekkender sanatyna jatqyzylǵan barlyq azamatqa kredıtter boıynsha tólemder avtomatty túrde osy jyldyń 1 sáýiri men 30 maýsym aralyǵynda 3 aı merzimge keıinge qaldyrylady. Sondaı-aq osyǵan baılanysty keshiktirilgen nesıege aıyppul men ósimpul eseptelmeıtin boldy.
Bul – jeke kásipkerlerge de baılanysty. Sý tasqyny kezinde zaqymdanǵan shaǵyn jáne orta bıznes sýbektilerine olar bergen ótinishti eskere otyryp, kredıt boıynsha tólemderdi keıinge qaldyrý múmkindigi beriledi.
Bankter men MQU árbir zardap shekken qaryz alýshyǵa múlikke jáne jeke sharýashylyqqa, qaryz alýshylardyń kiristeri men qarjylyq jaǵdaıyna keltirilgen zalaldyń áserin baǵalaý úshin jeke taldaý júrgizip, kredıt boıynsha qosymsha derbes qoldaý kórsetý sharalary aıqyndalatyn bolady. Búginde qaryz alýshylarǵa kómek kórsetý sharalary týraly habarlandyrý áleýmettik jelilerdegi kredıttik uıymdardyń resmı saıty men akkaýntynda tıisti ótinishti berýdiń naqty algorıtmderi jáne kredıtti qaıta qurylymdaýdy júrgizý tártibi jarııalana bastady. Bul úderisti jeńildetý úshin bankter men MQU zardap shekkenderdiń ótinishin onlaın qabyldaýdy da josparlaǵan.
Qazir túrli uıym men qor, sondaı-aq jekelegen kompanııa men kásipkerler tasqynnan keıin taryqqan elge qoldaý bildirip jatyr. Bul sanatqa eriktiler jumysynda qosýǵa ábden bolady. Sý tasqynynan zardap shekken el turǵyndaryna Halyk Bank jáne «Halyq» qory kómek retinde óz qarajatynan 1 mlrd teńge bólý týraly birlesken sheshim qabyldady. Al Bolat О́temuratov qory bul jaǵdaıǵa qatysty 680 mln teńge bóldi.
«Osy kúnderi mıllıondaǵan jerlesimiz tabıǵı apat saldarynan qıyn kezeńnen ótip, dúnıe-múlikterinen aıyrylyp jatqandaryn kórip, qolushyn berýdi jón kórdik. Bul qarjylaı kómek zardap shekken otandastarymyzǵa alǵashqy qajettilikterin alyp, osy kezeńnen aman-esen shyǵýǵa kómektesedi degen senimdemiz», deıdi qor dırektory Marat Aıtmaǵambetov.
«Astana Motors» qazaq motor avtokompanııasy da bul ıgi isten shet qalmady. Qıyndyqta qalǵan óńir turǵyndaryna kómek retinde 500 mıllıon teńge aýdardy. Kompanııa bólgen qarajat «Demeý Qazaqstan qory» korporatıvtik qorynyń shotyna aýdarylǵan.
Dál osyndaı somadaǵy qarjyny eldegi jetekshi qurylys kompanııalarynyń biri – «BI Group» holdıngi aýdardy. Aıta keteıik, holdıng sý tasqynynyń alǵashqy kúninen-aq zardap shekkenderge kómek kórsetip, oblys basshylyqtaryn qurylys jáne arnaıy tehnıkamen, qajetti materıaldyq resýrstarmen qamtamasyz ete bastaǵan. Al bólingen qarajat qaıta qalpyna keltirý, qurylys-montaj jumystaryn júrgizýge jumsalady.
Búginde myńdaǵan el turǵyny otbasylarymen birge ýaqytsha baspanalarǵa ornalasqan. Olarǵa qajetti azyq-túlik pen dári-dármek qory da jınaqtalyp jatyr. Buǵan qosa Kaspi.kz «Biz Birgemiz Qazaqstan» qaıyrymdylyq qorymen birlese otyryp, mobıldi qosymsha arqyly kómek kórsetý sharasyn uıymdastyrdy.
«Bizdiń qor ashyq túrde jumys istep, qarajattyń jumsalýy boıynsha barlyq qujattyń durystyǵyn kórgen Kaspi.kz bizben yntymaqtasýǵa sheshim qabyldady jáne jedel túrde kómek jınaýdy uıymdastyrdy. El azamattarynan az kún ishinde 80 mıllıon teńgeden astam aqsha jınady. Al Kaspi.kz saıtynyń bul somaǵa taǵy 120 mıllıon teńge qosý týraly sheshimi – biz úshin úlken tosynsyı. Osyndaı qoldaýy úshin Kaspi.kz basshylyǵyna alǵysymyz sheksiz, endi bizdi volonterlermen jumys kútip tur. Zardap shekkender men qutqarýshylarǵa kómekteskenderdiń barlyǵyna rahmet», deıdi «Biz Birgemiz Qazaqstan» QQ tóraǵasy Perızat Qaırat.
Al Kaspi.kz negizin qalaýshy jáne basshysy Mıhaıl Lomtadze sý tasqynynyń zardaptary tez arada joıylyp, adamdardyń óz úılerine oralýyna tilektestigin bildirdi.
«Qaıyrymdylyq aksııamyzǵa atsalysqan azamattardyń árqaısysyna alǵys aıtamyz. Kaspi.kz – áleýmettik jaýapty kompanııa jáne biz árqashan qıyn jaǵdaıda tutynýshylarymyzǵa qoldaý kórsetýge tyrysamyz. Jıylǵan aqsha «Biz Birgemiz Qazaqstan» qoǵamdyq qoryna Aqtóbe jáne Qostanaı oblystarynda jol jóndeý, qutqarý tikushaqtarynyń jumysyn qamtamasyz etý, generatorlar, sorǵylar, úrlemeli qaıyqtar men dári-dármekter satyp alýǵa jiberiledi», dedi ol.
Búginde kómek jınaý áli de jalǵasyp jatyr. Kaspi.kz mobıldi qosymshasynyń «Qaıyrymdylyq» bóliminde kez kelgen adam zardap shekkenderge kómektesý úshin «Biz Birgemiz Qazaqstan» qoryna aqsha aýdara alady. Sondaı-aq Kaspi.kz klıentter men seriktesterine kómektesip, muqtaj jandardyń nesıeni óteý merzimin keıinge qaldyrýdy kózdep otyr.
Qazir sý basqan aýmaqtardaǵy adamdar shynymen de kómekke zárý. Kóptegen aýylǵa tek tikushaqtar nemese qaıyqtar arqyly jetýge bolady. Qutqarýshylar adamdardy evakýasııalaýdy jalǵastyryp, qalpyna keltirý jumystary belsendi júrgizip jatyr.
