Foto: stan.kz
Premer-mınıstrdiń orynbasary jáne TJM basshysy Qaraǵandy oblysyndaǵy ózen alaptaryn áýeden baqylap, óńirdegi ahýalmen tanysty. Jaǵdaı kúrdeli dep baǵalanýda: óńirde sý tasqynynyń ekinshi tolqyny boljanyp otyr. Nura, Osakarov aýdandary aýmaqtarynyń 40%-ynda jáne Aqtoǵaı aýdanynyń soltústik bóliginde qar erimegen. Tótenshe jaǵdaılardyń aldyn alý úshin sý tasqyny qaýpi bar aýdandarǵa azamattyq qorǵaý qyzmetiniń qosymsha kúshteri men quraldary tartyldy. Barlyq qajetti jumystar júrgizilýde, dambylar nyǵaıtylyp, jergilikti atqarýshy organdar men qyzmetter tehnıkamen qamtamasyz etildi.
Shtab basshysynyń orynbasary TJ rejimi jarııalanǵan Shet aýdanyndaǵy jaǵdaımen tanysty. Tórt aýylda – Qaıraqty, Aqsý, Krasnaıa Polıana, Deripsalda 40 úıge sý kirgen, 292 adam qutqaryldy, olardyń 114-i bala. Qazirgi ýaqytta jaǵdaı birshama turaqtalyp keledi, keıbir turǵyndar úıine qaıtyp kelip jatyr.
Qanat Bozymbaevqa sý tasqyny aýyr saldarynyń aldyn alý úshin qabyldanǵan sharalar týraly baıandaldy. TJD málimetinshe, eń qıyn kezeń 29-30 naýryzda bolǵan. Qazir sý qoımasy kúsheıtilgen rejimde jumys istep tur.
«Nura men Sherýbaı-Nuranyń bas jaǵynda qardyń tez erýi basyldy. Qar beti qalyń emes. Nura ózenine qosylyp jatqan artyq sý baıqalmaıdy. Qarqaraly jáne Buqar jyraý aýdandary aýmaqtarynda sý tasqynynyń sharyqtaý shegi ótip ketti dese de bolady», dep baıandady TJD bastyǵy Murat Qatpanov.
Shtab basshysynyń orynbasary Shet aýdany aýyldarynyń zardap shekken turǵyndarymen kezdesý barysynda sý tasqynynan kelgen barlyq shyǵyndy Komıssııa baǵalap, tolyq óteletinin atap ótti.
«Memleket basshysy sý tasqyny zardaptaryn barynsha azaıtýdy, birinshi kezekte, halyqtyń qaýipsizdigin qamtamasyz etýdi tapsyrdy. Komıssııa barlyq úıdi tekseredi. Kómek kórsetiledi, múlik qalpyna keltirilip, óteledi. Eger úıler jaramsyz dep tanylsa, jańasy salynady nemese ekinshi naryqtan basqa baspana satyp alynady», dep túsindirdi Qanat Bozymbaev aýyl turǵyndaryna.
Qazir Shtabtyń basty nazarynda – Nura ózeniniń alaptary. Oblys ákimdigi eldi mekenderdi sý basý qaýpiniń aldyn alý maqsatynda preventıvti sharalar qabyldap jatyr. О́z kezeginde Úkimet tarapynan barlyq qajetti kómek kórsetiledi.
Aqmola oblysy men Astana qalasy ákimderine Arshaly jáne Selınograd aýdandarynda sý tasqynyna qarsy kúshter men quraldar daıyndaý boıynsha tapsyrmalar berildi.
