Foto: «AMANAT» partııasy, telegram
«AMANAT»-tyń Batys Qazaqstan oblystyq fılıalynyń atqarýshy hatshysy Azamat Safımalıevtiń aıtýynsha, partııalyqtar óńirdegi tótenshe jaǵdaıdan zardap shekkenderge jan-jaqty kómek kórsetip otyr.
«7,2 mıllıon teńge jınap, 13 tonna gýmanıtarlyq kómek jiberdik. Atap aıtqanda, Qaratóbe aýdanyna – 7 tonna, Syrym aýdanyna – 4 tonna, Terekti aýdanynyń Podstepnoe aýylyna – 1 tonna, Oral qalasynyń turǵyndary úshin – 1 tonna gýmanıtarlyq kómek jınaldy. Onyń ishinde azyq-túlikten bólek, balalar men eresekterge arnalǵan jyly kıimder, rezeńke etikter, turmystyq zattar jáne t.b. kerek-jaraq dúnıeler bar», dedi ol.
«Jastar Rýhy» jastar qanatynyń ókilderi men volonterleri TJ qyzmetterimen jáne jergilikti atqarýshy organdarmen birge turǵyndardy evakýasııalaýǵa, olardy arnaıy pýnktterge ornalastyrýǵa, úılerdi sý tasqynynan qorǵaýǵa, sý jolyna ınertti materıal salynǵan qaptardy tóseýge, sý burý aryqtaryn qazý jumystaryna kómek jasaýdy jalǵastyryp jatyr.
Sonymen qatar Májilis depýtattary, «AMANAT» partııasy fraksııasynyń músheleri Nurtaı Sabılıanov pen Sergeı Ponomarev sý tasqynynan zardap shekken turǵyndarmen kezdesti. Depýtattardyń aıtýynsha, arnaıy komıssııa apat saldarynan kelgen zalal kólemin esepteýdi bastady. Komıssııa nátıjeleri boıynsha zardap shekken otbasylardyń shyǵyndary óteledi.
