Atyraý oblystyq perınataldyq ortalyǵynyń dırektory Qazbek Ermaǵambetovtiń aıtýynsha, úshemniń anasy Bekzada Qadyrbaevanyń jasy 26-da. Oǵan júktiliktiń 33-aptasynda operasııa jasalǵan.
Ortalyq dırektorynyń orynbasary Gúlmıra Ábekeevanyń aıtýyna qaraǵanda, úshemniń bireýi ul, ekeýi qyz. Jas otbasy sábılerine Abdýlhakım, Hafıza, Habıba esimin bergen.
«Sábıler ártúrli salmaqpen ómirge keldi. Báriniń de salmaǵy 2 kıloǵa jetpegen edi. Biri – 1 711, ekinshisi – 1 823, úshinshisiniń salmaǵy 1 420 gramm boldy. Náresteler shala týǵandyqtan jansaqtaý bóliminde jasandy jeldetý qurylǵysyna qosyldy. Osy bólimde tolyqqandy em aldy. Perzenthanada jaǵdaıy turaqtanyp, tynys alýy jaqsarǵanǵa deıin 37 kún jatty. Sonan soń úıine shyǵaryldy. Qazir sábılerdiń salmaǵy ulaıyp, 1 700, 2 400, 2 500 gramǵa jetti», deıdi G.Ábekeeva.
«Azamattarǵa arnalǵan úkimet» memlekettik korporasııasy» KeAQ Atyraý oblysy boıynsha fılıaly dırektorynyń orynbasary Nurlan Dúısembaev úshemniń týý týraly kýáligin tabys etti. Al oblystyq perınataldyq ortalyǵynyń dırektory Qazbek Ermaǵambetov úshemniń áke-sheshesine arnaıy sertıfıkat tabystady.
Atyraý oblysy
