Osyǵan baılanysty oblys ákimi Serik Shápkenov sý tasqynyna qarsy jumystardy kúsheıtý úshin iri munaı kompanııalary ókilderimen jıyn ótkizdi. Jıynda «AtMО́Z», «Teńizshevroıl» JShS, «NCOC N.V» kompanııasyna, «Embimunaıgaz», «QazTransOıl» AQ jáne «Kaspıı qubyr konsorsıýmyna» tehnıkalardy jumyldyrý tapsyryldy.
Oblys ákiminiń orynbasary Qaırat Nurtaev Qyzylqoǵa aýdanyna baryp, tasqyn sýǵa qarsy jumystarǵa basshylyq etýdi qolǵa aldy. О́ıtkeni munda Oıyl ózeniniń jaǵalaýynan asqan sý Qonystaný, Taısoıǵan, Qarabaý aýyldaryna jetken. Sol sebepten Qonystaný aýlyna bógetti nyǵaıtý úshin 50 qutqarýshy, 20 erikti, 1,5 myń qap pen qajetti qural-jabdyqtar jetkizildi. Taısoıǵan jáne Qarabaý aýyldaryna 60 qutqarýshy bardy.
Qyzylqoǵa aýdany ákiminiń orynbasary Jaras Esenǵalıevtiń málimetine súıensek, Mııaly, Jangeldın, Oıyl, Kózdiǵara, Tasshaǵyl, Qarakól, Qyzylqoǵa, Taısoıǵan aýyldyq okrýgterine tasqyn sýdan tónetin qaýip áli de baıqalady.
«Qyzylqoǵa aýdanynda 31 naýryzda tótenshe jaǵdaı jarııalandy. Sol kúni Mııaly aýlynan 654 turǵyn 3 evakýasııalyq pýnktke kóshirildi. Bul aýylǵa tóngen qaýip seıilip, turǵyndar úıine oraldy. Al Taısoıǵan aýyldyq okrýginiń 139 turǵyny Atyraý qalasy men Mııaly aýlyndaǵy týystarynyń úıine jetkizildi. Kózdiǵara aýyldyq okrýginiń turǵyndary Jańasharýa orta mektebine ornalastyryldy», dep málimdedi J.Esenǵalıev.
Onyń aıtýynsha, 2 sáýirde Kózdiǵara okrýgindegi Qonystaný aýlynda saıda ornalasqan 4 turǵyn úıdi sý basty. Úıdiń biri bos turǵan. Eki úıden 8 turǵyn men qoradaǵy mal qaýipsiz aımaqqa kóshirilipti. Bul aýyldyq okrýgte 1 744 turǵyn bar. Okrýgke qarasty Qosqulaq jáne Búırek eldi mekeniniń 215 turǵyny, 1 266 múıizdi iri qara, 551 jylqy, 66 túıe, 422 qoı-eshki qyr basyna shyǵaryldy.
Al Taısoıǵan aýlynda 30 qutqarýshy, Atyraý qalasynan kelgen 10 erikti, aýyldyń 60-ǵa jýyq turǵyny apattyń aldyn alý úshin jumyla iske kiristi. Bul aýylda burynnan 2 shaqyrym bóget bar. Endi buǵan qosa 600 metrge jýyq bóget turǵyzyldy. Sondaı-aq 2,5 shaqyrymdyq kanal qazyldy.
Aýdan ákimi orynbasarynyń aıtýyna qaraǵanda, Oıyl aýyldyq okrýgine qarasty Balabeıit qystaǵy tasqyn sýdyń qorshaýynda qalǵan. Qutqarý jasaǵy 2 qaıyqpen qystaqtaǵy 11 adam men 173 maldy qaýipsiz aýmaqqa shyǵarǵan.
«Mııaly aýlynan Saǵyzǵa baratyn joldyń 4-shaqyrymy tusyn sý shaıyp, kólik qozǵalysy toqtady. Aýdan ortalyǵynan Qarabaý baǵytyndaǵy jol da búlindi. Jasqaırat aýlynan 2 shaqyrym qashyqtyqtaǵy joldyń 130 metrge jýyǵy búlingendikten, avtokólik qozǵalysy shekteldi. Tasqyn sý jyrǵan jol bólikteri jergilikti bıýdjet esebinen qalpyna keltiriledi», deıdi J.Esenǵalıev.
Oblys ákiminiń taǵy bir orynbasary Marat Mýrzıev Jylyoı aýdanyndaǵy Jem ózeniniń jaǵalaýyn bekitý jumysyna basshylyq jasap júr. О́ıtkeni 2 sáýirde aýdandaǵy Jem – Aqkıiztoǵaı gıdrobeketindegi sý deńgeıi kúndizgi saǵat 8.00-den 20.00-ge deıin 55 sm-ge kóterilgen. Keshki mezgildegi sý deńgeıi – 3,25 metr.
Jemniń sýy Aqkıiztoǵaı aýlyna qaýip tóndirdi. Jylyoı aýdany ákiminiń orynbasary Gúlnafıs Aıshýaqovanyń málimetinshe, atalǵan aýylǵa tóngen qaýipti seıiltý úshin bóget turǵyzýǵa 100-ge jýyq adam, 11 tehnıka tartylǵan.
Oblys ákiminiń orynbasary Jasulan Bısembıevtiń aıtýyna qaraǵanda, Jaıyq ózenindegi sý deńgeıi baqylaýǵa alynyp otyr. О́ıtkeni bul ózenniń jaǵalaýynda Inder jáne Mahambet aýdandarynyń, Atyraý qalasynyń 30-dan asa eldi mekeni ornalasqan.
«Jaıyq ózenine Reseıdiń Orynbor oblysyndaǵy Irıklın sýqoımasynan jiberilgen sý quıady. 1 sáýirde kórshi eldegi sý qoımasynan keletin sýdyń kólemi sekýndyna 90-nan 390 tekshe metrge deıin artqan. Osyǵan baılanysty Jaıyq ózeniniń Atyraý oblysyndaǵy jaǵalaýyna zerdeleý júrgizildi. Oblys ákimi Serik Shápkenov Jaıyq ózeniniń Inder, Mahambet aýdandary men Atyraý qalasyndaǵy jaǵalaýynyń osal tustaryna ınertti materıaldardy tósep, qum toltyrylǵan qappen bekitýdi tapsyrdy», dedi J.Bısembıev.
Atyraý oblysy
