Foto: OKQ
D.Nurǵalıevanyń aıtýynsha 10 óńirde ákimdikter jergilikti aýqymdaǵy 30 TJ jarııalady. Bul – Aqtóbe, Qostanaı, Qaraǵandy, Aqmola, Atyraý, Pavlodar, Batys Qazaqstan, Soltústik Qazaqstan, Abaı, Ulytaý oblystary. Sý tasqyny kezinen bastap el boıynsha 72 myńnan astam adam evakýasııalandy, onyń ishinde 17 myńnan astamy kámeletke tolmaǵandar. Ýaqytsha ornalastyrý pýnktterinde 14 466 adam bar, olardyń 7 269-y bala.
«TJ mınıstri men jedel shtab qyzmetkerleri Qostanaı oblysynda jumys istep jatyr. Tobyl ózeninde sý deńgeıiniń kóterilý qaýpi saqtalyp tur. Búginde óńirdiń TJD kúshteri men eriktiler tartylyp jatyr. Qyzylorda, Astana, Qaraǵandy oblystarynan, sondaı-aq Almaty qalasynan kúshter toptary kómekke keledi. Qazirgi ýaqytta Tobyl ózeniniń jaǵalaý syzyǵy úlken kópirde nyǵaıtylyp jatyr. Eriktiler toby jumyldyrylyp, táýligine 200 adam qutqaryldy. Qostanaı oblysynda barlyǵy 7,5 myńnan astam adam qutqaryldy jáne evakýasııalandy», dedi atalǵan brıfıngte TJM-niń resmı ókili.
Qostanaı oblysynyń evakýasııalyq pýnktterinde 700-den astam adam ornalastyrylǵan.
