Komıssııa jumysyn aıaqtap qaldy
Juma kúni oblys ákimi Ermaǵanbet Bólekpaev Shet aýdanyna baryp sý tasqynynan zardap shekken elmen kezdesip, apat saldaryn joıý jónindegi shtabtyń otyrysyn ótkizdi. Aımaq basshysy dúısenbige deıin keltirilgen barlyq shyǵyndy eseptep aıaqtaýdy tapsyrdy.
«Qazirgi kezde aýdandyq komıssııa belsendi jumys istep jatyr. Úılerdi tehnıkalyq tekserý aıaqtaldy, ony akkredıttelgen uıym júrgizip jatyr. Tólemdi osy aptada bastaımyz. Sonymen qatar zardap shekkenderge 100 AEK kóleminde birjolǵy materıaldyq kómek kórsetiledi», deıdi Shet aýdanynyń ákimi Muhıt Muhtarov.
Veterınarlyq stansa mamandarynan quralǵan komıssııa toby maldyń shyǵynyn da eseptedi. Sý tasqynynan 22 jylqy, 72 usaq mal jáne 17 iri qara ólgen. Keltirilgen shyǵyn ıelerine óteledi.
Buǵan qosa aýdanda sý shaıǵan ishki joldardy qalpyna keltirý jumystary bastalyp ketti. Aýdan aýyldarynda sý tasqyny kezinde 39 myń tekshe metr erigen sý sorylyp, 45 myń dana qumdy qap tóselip, qorǵanys oqpandaryn nyǵaıtýǵa 2,5 myń tonna ınertti materıal jumsaldy.
«Aımaǵymyzda sý tasqynynyń qaýipti kezeńi ótti. О́zara birligimizdiń arqasynda biz oblysymyzda sý tasqynynyń zalalyn barynsha azaıttyq. Bizdiń barlyq 237 gıdrotehnıkalyq qurylystarymyz úzdiksiz jumys istep, qajetti sý kólemin qabyldady. Bıyl Sherýbaı-Nura sý qoımasy arqyly 256 mln, al Samarqand jáne Yntymaq sý qoımalarynan 410 mln tekshe metr sý ótti. Mundaı sý kólemi 2017 jyly bolǵan edi. Kóbi sol jyly sý tasqyny saldarynyń qandaı bolǵanyn biledi. Buryn qabyldanǵan sharalardyń sý tasqynynyń saldaryn azaıtýda mańyzdy ról atqarǵanyn atap ótkim keledi. Biz barlyq shyǵyndy qalpyna keltirýge kómektesemiz. Jumystar bastalyp ketti. Aýyldardy sý basyp qalmas úshin biz oblystyq mańyzy bar úsh joldy qazýǵa májbúr boldyq, endigi ekeýi qalpyna keltirildi. 8 jol ýchaskesin sý shaıdy, tórteýi qalypqa keltirildi. Sondyqtan ázirge jol qozǵalysynda qıyndyqtar týyndaýy múmkin. Qalǵan joldardy da tezdetip qalpyna keltiremiz. Aqtóbe, Batys Qazaqstan, Qostanaıdaǵy kúrdeli jaǵdaıdy eskere otyryp, biz ondaǵy elge qoldaý kórsetýge daıynbyz. Osy rette bizdiń jerlesterimizdi jáne kásipkerlerdi qoldaý bildirýge shaqyramyn. Mundaı syn saǵatta birligimizdi tanytyp, qoldaý kórsetý asa mańyzdy», dedi oblys ákimi.
Kúni-túni kezekshilik kúsheıtildi
Kosmomonıtorıngtiń málimetinshe, oblys aýmaǵynyń 20 paıyzynda qar jamylǵysy qaldy.
«Aqtoǵaı aýdanyndaǵy Toqyraýyn ózeniniń arnasy boıyndaǵy jekelegen eldi mekenderde bólimshelerdiń kezekshiligi jalǵasyp jatyr. Sondaı-aq negizgi kúshimiz Nura aýdanynyń aýmaǵynda shoǵyrlanǵan. Onda TJD bólimsheleriniń, áskerı qolbasshylyqtyń jáne jergilikti atqarýshy organdardyń kúshimen jeti eldi mekende Nura ózeniniń arnasy boıynda nyǵaıtý jumystary júrgizilip jatyr. О́zendegi muzdardy da jaryp jatyrmyz», deıdi oblystyq tótenshe jaǵdaılar departamentiniń bastyǵy Murat Qatpanov.
Samarqand jáne Jartas sý qoımalarynan sý aǵyzý jyldamdyǵy tómendedi. Yntymaq sý qoımasynan sekýndyna 1 200 tekshe metr sý aǵyzý jalǵasýda. Osy sý qoımasynyń tómengi aǵysynda jaǵdaı turaqty, kesheli beri barlyq eldi mekenderde sý deńgeıi tómendedi. Alaıda táýlik boıy kezekshilik toqtatylmaıdy. Sý jaǵalaýlary ınertti qaptarmen bekitilip jatyr.
Sonymen qatar qarǵyn sýdyń astynda qalǵan aýyldaǵy aǵaıynǵa jan-jaqty gýmanıtarlyq kómek kórsetilip jatyr. Qoǵam belsendileriniń jáne volonterlerdiń bastamasymen Qaraǵandy qalasynda gýmanıtarlyq kómek jınaý beketteri ashyldy. Sý basqan aýdanǵa arnaıy júk kólikterimen kıim-keshek, kórpe-tósek, turmysqa qajetti zattar men azyq-túlikter jiberilip jatyr. Qaıyrymdylyq kerýeni sý basqan aýmaqtarǵa baryp, turmysqa qajetti zattar tapsyrýda. Beısenbide Qaraǵandy qalasyndaǵy «Dostyq úıiniń» aldynan shyqqan eki gazel kóligi turǵyndarǵa kerekti zattaryn jetkizdi.
– Birligi jarasqan eldiń janashyrlyǵy synalatyn shaqta jergilikti ákimdikter men máslıhattar, depýtattar, partııalastar, bıýdjettik jáne azamattyq uıymdardyń ókilderi, din qyzmetkerleri, jastar tarapy belsendilik tanytyp, halyqtyń kúshi birlikte ekenin taǵy bir márte dáleldedi. Úıimizdi sý basqaly qolushyn bergen jandar qanshama. Gýmanıtarlyq kómekter usynylyp jatyr. Qarǵyn sýdan zardap shekken aýyldaǵy aǵaıynǵa jaqsylyq jasaýǵa asyqqan qaraǵandylyqtarǵa, basqa da respýblıkadan kómek joldaǵan azamattarǵa alǵysym sheksiz, – deıdi Qaıraqty aýylynyń turǵyny Talǵat Shárip.
Sonymen qatar Tótenshe jaǵdaılar mınıstrligi men «Biz birgemiz» qorynyń ókilderi Qaıraqty aýylyna tikushaqpen azyq-túlik, jyly kıim men dári-dármek jetkizdi.
Qaraǵandy oblysy
