«Memleket basshysy Qasym-Jomart Toqaev bizde sońǵy birneshe onjyldyqta mundaı kólemdegi sý tasqyny bolmaǵanyn atap ótti. Sý tasqynyna baılanysty 10 oblysta jergilikti tótenshe jaǵdaı jarııalandy», dep eske saldy A.Merǵalıev.
Joǵarǵy Sot organynyń basshysy Sot ákimshiliginiń departamentterine sot ǵımarattaryn sý basýynan barynsha qorǵaýdy qamtamasyz etý boıynsha keshendi sharalar qabyldaýdy tapsyrdy. Olardyń qatarynda ákimdikter janyndaǵy jedel shtabtarmen ýaqytyly ózara is-qımyl ornatý, sot isteri men materıaldaryn, qyzmettik qujattamalardy shuǵyl evakýasııalaý úshin sý basý qaýpi joǵary aımaqtarda áreket etý toptaryn qurý jáne t.b. ataldy.
Otyrys barysynda sý tasqynynyń saldaryn joıýǵa qatysty isterdiń vedomstvolyq sottylyǵy men sottylyǵy máseleleri, sondaı-aq birkelki sot praktıkasyn qamtamasyz etý jaıy talqylandy.
A.Merǵalıev sottar jáne SÁ bólimsheleri basshylyǵynyń nazaryn azamattar arasynda týyndaıtyn quqyqtyq máseleler boıynsha túsindirý jumystaryn júrgizý qajettigine aýdardy.
