Foto: N.Baıbýlın.
Atalǵan zańdardyń basty maqsaty – balalardyń qaýipsizdigin qamtamasyz etý máseleleri boıynsha memlekettik saıasattyń quqyqtyq, ekonomıkalyq, áleýmettik jáne uıymdastyrýshylyq negizderin jetildirý, áıelder men balalarǵa qatysty qylmystardyń aldyn alý jáne jolyn kesý.
«Áıelderdiń quqyqtary men balalardyń qaýipsizdigin qamtamasyz etýge Prezıdentimiz únemi basa mán berip keledi. Memleket basshysynyń tapsyrmasy aıasynda arnaıy zańdar ázirlendi. Osylaısha, áıelder men balalardyń zańdy múddelerin qamtamasyz etý jáne elimizde otbasy ınstıtýtyn nyǵaıtý úshin qosymsha quqyqtyq tetikter engizilip otyr. Sondaı-aq otbasylyq zorlyq-zombylyq úshin jaýapkershilik kúsheıtildi», dedi Máýlen Áshimbaev.
Senat Tóraǵasy osy zańdar aıasynda ómirde qıyn jaǵdaıǵa tap bolǵan otbasylardy qoldaýǵa arnalǵan erejeler de qarastyrylǵanyn atap ótti. Zań normalary arqyly tıisti ýákiletti organdardyń ókilettikteri aıqyndalady. Otbasyn qoldaý ortalyqtary jáne «111» baılanys ortalyǵy sııaqty uıymdardyń quzyretteri de zańnamalyq deńgeıde belgilenedi.
«Maquldanǵan zańdarǵa sáıkes endi densaýlyqqa qasaqana jeńil zııan keltirgeni jáne uryp-soqqany úshin qylmystyq jaýapkershilik qarastyrylady. О́z kezeginde sot qylmystyq quqyq buzýshylyq jasaǵan adamnyń tártibine qatysty erekshe talaptar belgileı alady. Sondaı-aq býllıng, kıberbýllıng balalardy qoǵamdyq kólikten májbúrlep túsirip ketý áreketteri úshin ákimshilik jaýapkershilik kózdelip otyr. Aldaǵy ýaqytta bul zańdar áıelder men balalardyń konstıtýsııalyq quqyqtary men múddelerin qorǵaýǵa tyń serpin beredi dep senemiz», dedi Palata Spıkeri.
Otyrysta Parlament depýtattary bastamashy bolǵan «QR-nyń keıbir zańnamalyq aktilerine halyqtyń kóshi-qony jáne qylmystyq-atqarý júıesi salalaryndaǵy zańnamany jetildirý máseleleri boıynsha ózgerister men tolyqtyrýlar engizý týraly» zań da birinshi oqylymda qaralyp, maquldandy. Qujat halyqtyń kóshi-qony jáne qylmystyq-atqarý júıesi salasyndaǵy zańnamany jetildirýge arnalǵan. Naqty aıtqanda, kámeletke tolmaǵandardyń jynystyq qol suǵylmaýshylyǵyna qarsy qylmystary úshin sottalǵan sheteldikterdiń elimizge kirýin jáne QR azamattyǵyn alýyn shekteý kózdelgen. Odan bólek, ekstremıstik nemese terrorıstik áreketterge qatysy bar sheteldikterdiń elge kirýine tyıym salynady. Zańda óńirlerge qonys aýdarýshylar úshin jaǵdaı jasaýǵa jáne «qandas» mártebesin berý rásimin jetildirýge arnalǵan ózgerister de bar.
Sondaı-aq Palata otyrysynda senatorlar Olga Býlavkına, Serik Shaıdarov, Rýslan Rústemov, Sultan Dúısembınov, Sáken Arýbaev, Bekbolat Orynbekov, Ǵalıasqar Sarybaev, Sultanbek Mákejanov, Bıbigúl Jeksenbaı túrli máseleler boıynsha depýtattyq saýaldaryn joldady.
