Akýsherlik – kez kelgen memleket úshin ana men balanynyń amandyǵy men densaýlyǵynyń kepili bolsa, BUU-nyń ornyqty damý maqsattarynyń 17-niń altaýynda akýsherlerdiń yqpaly atap ótiletini kezdeısoqtyq emes.
«Akýsherler densaýlyqty nyǵaıtyp, aýrýlardyń aldyn alýda, ana men balany emdeý men kútýde mańyzdy ról atqarady. DDU málimetteri medbıkeler men akýsherler búkil álemdegi densaýlyq saqtaý qyzmetkerleriniń jartysyna jýyǵyn quraıtynyn dáıekteıdi. Akýsherlerdiń kóshbasshylyǵyn ilgeriletip, kásibı daıarlyq baǵdarlamalarynyń kómegimen teń quqyly jáne laıyqty eńbek jaǵdaılaryna qol jetkizýde múmkindikterin keńeıte túsý óte mańyzdy», deıdi DDU-nyń Qazaqstandaǵy eldik keńsesiniń ókili Skender Syla.
Al Qazaqstanda akýsherlik tájirıbeni odan ári damytý ana men bala ólim-jitiminiń deńgeıin tómendetýmen qatar, birqatar ózekti mindetterdi sheshýdi qamtıtyndyqtan, I Halyqaralyq kongress Eýropalyq odaq elderiniń mysalynda aýyldyq jerlerden qalaǵa deıin akýsherlik qyzmet kórsetý modelderin talqylaý, júktilik pen bosaný kezinde ishtegi sharananyń jaǵdaıyn anyqtaý barysyndaǵy akýsherlerdiń yqpaly, perınataldyq shyǵyndardy súıemeldeýdegi róli, perzenthanalardaǵy ınfeksııalyq baqylaýǵa áseri men basqa da mańyzdy kásibı máseleler sııaqty ózekti taqyryptardy talqylap otyr.
Kongreske qatysýshylarǵa arnalǵan quttyqtaý sózinde QR Densaýlyq saqtaý mınıstri Aqmaral Álnazarova: «Akýsherlik kómek júıesin odan ári nyǵaıtý úshin oqytý men daıarlyqty uıymdastyrýǵa ınvestısııa salý, laıyqty jalaqy, sondaı-aq qoldaý men qurmet kórsetiletin qaýipsiz ortada jumys isteý múmkindigi qajet. Sondyqtan akýsherlerdi daıyndaýǵa qarajat salyp, árbir áıelge ómiriniń eń mańyzdy sátterinde qajetti kómek pen qoldaýǵa qol jetkizýge múmkindik beretin ýaqyt keldi. Akýsher mamandaryn daıyndyq sapasy olardyń bosaný kezinde áıelder men jańa týǵan nárestelerge qaýipsiz ári tıimdi kútim kórsetý úshin qajetti bilim, mashyqtar men daǵdylardyń bar-joǵyna tikeleı táýeldi. Júktilik pen áıelderdiń aman-esen bosanýy akýsherlerdiń tájirıbesine, bilimi men kásibı sheberligine baılanysty ekeni belgili. Sondyqtan akýsherlik kómek júıesine salynǵan ınvestısııalar árbir sábıdiń qalaýly, árbir bosanýdyń qaýipsiz bolýyna taǵy da bir qadam jasaýǵa múmkindik beredi», deıdi.
Nazarbaev Ýnıversıtetiniń Medısına mektebiniń vıse-prezıdenti ári dekany doktor Massımo Pınıatellı: «Akýsherlerdiń halyqaralyq kongresi álemdik ozyq tájirıbelerdi jergilikti qajettiliktermen biriktirý jolyndaǵy mańyzdy bastama. Halyqaralyq standarttar men zertteýlerdi qosa alǵanda, biz árbir ana men balaǵa kórsetiletin medısınalyq kómektiń sapasyn arttyrýǵa umtylamyz. Bul kongress bizdiń densaýlyq saqtaý salasyndaǵy biliktiligimizdi ilgeriletýge peıildi ekenimizdi kórsetedi jáne barlyq múddeli taraptarǵa paıdasyn tıgizetin mýltıdıspınarlyq tásildi qoldanýǵa yqpal etedi», deıdi.
Eki kún boıy otandyq jáne halyqaralyq spıkerleri alǵashqy medısınalyq-sanıtarlyq kómek modelinde akýsherlik qyzmet kórsetýdiń negizgi tásilderi týraly baıandap, akýsherlik tájirıbede naqty oqıǵalarmen qalaı jumys isteıtinin, ǵylymǵa negizdelgen akýsherlik praktıkadaǵy sheshýshi sátterdi talqylady.
Kongreste bosanǵannan keıingi qan ketýlerdiń aldyn alýda pnevmatıkalyq emes shokqa qarsy kostıýmderdi (NASG) qoldaný, júkti áıelderge patronajdyq qyzmet kórsetýdiń ámbebap progressıvti modeli men akýsherlik praktıkadaǵy basqa da ózekti taqyryptar boıynsha sheberlik synyptary ótkizildi.
О́z kezeginde I Halyqaralyq akýsherler kongresinin uıymdastyrýǵa uıytqy bolǵan AYALA qaıyrymdylyq qorynyń negizin qalaýshy áriprezıdenti Aıdan Súleımenova: «Bizdiń qor – 17 jyldan beri Qazaqstannyń neonatologııasy men perınatologııasyn damytýda memleketke júıeli túrde kómek kórsetip kele jatqan jalǵyz qor. О́z jumysymyzda medısına jumyskerleriniń kásibı damýyn qoldaýǵa erekshe kóńil bólemiz. Jyl saıyn qor taıaý jáne alys shet elderdiń úzdik praktık mamandarynyń qatysýymen Qazaqstanda tájirıbelik sheberlik synyptaryn ótkizedi. Sondaı-aq dárigerlerdi shetelge oqýǵa, biliktiligin arttyrýǵa jiberemiz. Bizdiń tegin beıne kýrstary bar «AYALA onlaın-akademııasy» platformasynda 1,5 myńnan astam neonatolog jáne neonataldyq medbıke tirkelgen. О́tken jyly perınataldyq ortalyqtardyń orta medısına qyzmetkerleriniń quzyrettiligi men saraptamasyn odan ári damytýǵa oń serpin bergen alǵashqy Halyqaralyq neonataldyq medbıkeler forýmyn ótkizdik. Bıyl Qazaqstanda alǵash ret Halyqaralyq akýsherler kongresin uıymdastyryp otyrmyz. Bul bastama QR Densaýlyq saqtaý mınıstrligi tarapynan qoldaý tapqanyna qýanyshtymyz. Taqyryptar men spıkerlerdiń barlyq qatysýshylar úshin ózekti ári qyzyqty ekenin kórip otyrmyz. Osy forýmda bólisken bilim men tájirıbe elimizdegi akýsherlik tájirıbeni jetildirýge jáne ult densaýlyǵyn nyǵaıtýǵa kómektesedi dep úmittenemiz», dedi.
