Munaıly qalada ashyq fýtboldan alǵash ret ótken jarysta, ıaǵnı QFL birinshi lıgasy aıasynda ótken oıynda aqtaýlyq «Kaspıı» fýtbol klýby óskemendik «Altaı» komandasyn qabyldady. Jańaózen qalasyndaǵy Ámın Tuıaqov atyndaǵy stadıon jankúıerlerge lyq tolyp, jıylǵan myńdaǵan jankúıer jerlesterine zor qoldaý kórsetti. Jankúıerlerdiń ystyq yqylasy tekke ketken joq, oıyn nátıjesinde «Kaspıı» 4:1 esebimen jeńiske jetti.
– Birinshi lıgaǵa daıyndyqty aqpan aıynan bastaǵan edik. Bul – «Kaspıı» klýbynyń jyl basynan beri ekinshi oıyny. Alǵashqy oıyn Arys qalasynda ótip, jeńispen oralǵanbyz. Dál sol nátıjeni búgin kórsettik, – deıdi «Kaspıı» fýtbol klýbynyń basshysy Nurjan Jalǵasbaev.
Oıyn sońynda eki komandanyń ókilderi baspasóz konferensııasyna qatysyp, búgingi lıga týraly pikirin bólisti. Aldaǵy ýaqytta «Kaspıı» fýtbol klýbynyń óz jerimizde bolatyn jarystarynyń barlyǵy Jańaózende ótedi, sondaı-aq qalada úlken fýtbol oınynyń ótýine qoldaý kórsetken qala ákimi Janseıit Qaınarbaev Jańaózende «Kaspıı» fýtbol ortalyǵy bólimshesin ashýdy qoldaıtynyn jetkizdi.
– 32 jyldan keıin qalamyzǵa úlken fýtbol qaıta oraldy. Men osyndaı joǵary deńgeıdegi jarysqa alǵash ret kelip turmyn. О́te qatty unap jatyr. Atmosferasy tym bólek. «Kaspıı» fýtbol klýbynyń jankúıerimin. Meniń janymda dostarym da bar. Barlyǵymyz aqtaýlyq komandaǵa senemiz. «Kaspıı», alǵa! Sportshylarymyz jaqsy oıyn kórsetip jatyr. Ári qaraı da úlken jeńister kútemiz. Búgingideı jarystar Jańaózende kóbeıse, jankúıer retinde qýanamyz, – deıdi jankúıer Ernar Nurlanuly.
Munaıly qala alańynda fýtbol tamashalaǵan jańaózendik jankúıerlerdiń qýanyshynda shek bolmady. Jastardyń qyzyǵýshylyǵyn arttyryp, bos ýaqytyn mańyzdy ótkizýi úshin buqaralyq sıpatqa ıe fýtbol syndy sport oıyndaryn, saıystaryn ótkizýdiń mańyzy zor.
Mańǵystaý oblysy
