«Páterge kóshkisi keletinderge páter satyp alyp beremiz. О́z qonysynda qalǵysy kelgenderge tıptik úlgidegi úıler salamyz. Mundaı úılerdiń jobasy daıyn. Bul úıler qysqa deıin tolyqtaı salynyp bitedi. Men Úkimetke aldaǵy jaz mezgilinde, sondaı-aq kúzde barlyq qurylys jumystaryn bitirý jáne apat saldaryn tolyq joıý jóninde mindet júktedim», degen Prezıdent sózinen keıin endi es jııa bastaǵan eldiń eńsesi kóterilip qalǵany ras.
Prezıdent tapsyrmasy aıasyndaǵy jedel is-sharalar óńirde júıeli túrde qolǵa alynyp, iske asyrylyp jatyr. Mysaly, Arqalyq qalasynda jumys istep jatqan arnaıy komıssııa 73 úıdi turýǵa jaramsyz, qalpyna keltirýge bolmaıdy dep tapqan. Sonymen qatar sý tasqyny kezinde baspanasyz qalǵandarǵa arnalyp 27 páter satyp alýǵa respýblıkalyq transfert arqyly 405 mln teńge qarjy bólindi. Qazirdiń ózinde Arqalyq qalasyna qonys aýdarýǵa nıet bildirgen Ekidiń, Qyzyljuldyz eldi mekenderiniń turǵyndary úshin 317 mln 183 myń teńgege 24 páter satyp alýǵa kelisimshart jasalǵan.
Bul páterlerdiń birine burynǵy Ekidiń aýylynyń turǵyny, zeınetker Saǵıra Ahmetjannyń otbasy qonystandy. Saǵıra apaıǵa eki bólmeli páteriniń kiltin qala ákimi Ámirhan Asanov tabys etip, jedel shtabqa kelip túsken gýmanıtarlyq kómekten azyq-túlik, tósek-oryn, basqa da kerekti jıhazdardy kirgizip berdi.
Qýanyshtyń kóz jasyn jasyra almaǵan Saǵıra apa: «Men otbasym dalada qalǵandaı kúı keshken qıyn sátte kómek qolyn sozyp, qamqorlyǵyna alǵan Memleket basshysyna, qala ákimdigine óte rızamyn. Páter kúrdeli jóndeýden ótken, tipti jıhazǵa deıin ákelip, oryn-ornyna ornalastyryp berip jatyr», deıdi.
Arqalyq qalasyna kóshýge nıet bildirgen Ekidiń jáne Qyzyljuldyz aýyldarynan barlyǵy 24 otbasy úshin páter satyp alýǵa 24 ótinish tústi. Qurylys salýshylarmen 317 mln 183 myń teńge somasyna 24 shart jasaldy, olar búgin shottarǵa túsedi.
Arqalyq qalasynan ózge aýdandarda da sý tasqyny saldaryn joıý, onyń ishinde búlingen múlik, zaqym kelgen turǵyn úıler tehnıkalyq tekserýden ótip, shyǵyn mólsherin baǵalaý jumystary júrip jatyr.
Zardap shekkenderge turǵyn úılerin qalpyna keltirý úshin aqshalaı qarajat túrinde ótemaqy tólenedi. Turǵyn úıi apatty jaǵdaıda turǵan jáne qalpyna keltirýge bolmaıtyn menshik ıelerine turǵyn úı satyp alýǵa nemese aýdany 80 sharshy metr bolatyn tıptik jobadaǵy jańa úı satyp alýǵa ótemaqy beriledi.
Oblys ákimdiginiń málimetinshe, búginge deıin birneshe aýdanda jumys istep jatqan arnaıy komıssııalar uzyn-yrǵasy 367 turǵyn úıdi tekserip shyqqan. Komıssııa 163 úıdi qalpyna keltirýge bolady degen uıǵarym jasap otyr. Al 204 úı múlde qalpyna kelmeıdi.
«Mysaly, Amangeldi aýdanynda 100 úı zertteldi. Onyń 61-i qalpyna keltirýge jaramaıdy, 39 úı jóndeýdi qajet etedi. Jangeldın aýdanynda 84 úı zertteldi, onyń 67-si qulaǵaly tur, 17 úıge jóndeý jumystaryn júrgizýge bolady. Arqalyq qalasynda tekserilgen 183 úıdiń 107-sine ǵana jóndeý júrgizýge bolady, qalǵan 76-syn súrip tastaǵannan basqa amal joq», deıdi komıssııa ókilderi.
Qostanaı oblysy
