Bul – elimizde alǵash ret negizgi zań jobasynyń kórý qabileti shekteýli azamattar úshin Braıl qarpimen usynylýy. Erekshe formattaǵy basylym kórý múmkindigi shekteýli jandardyń Konstıtýsııa mátinimen tolyq tanysyp, engizilgen ózgeristerdi erkin talqylaýyna múmkindik beredi.
Týyndynyń tanystyrylymynda jańa Konstıtýsııa jobasyndaǵy ózgerister keńinen túsindirilip, múmkindigi shekteýli azamattardyń quqyǵyn qorǵaý máselesi talqylandy. Qatysýshylar ózara pikir almasyp, usynystaryn ortaǵa saldy.
Erekshe basylym kitaphananyń oblystaǵy jalǵyz tıfloortalyǵynda Braıl prınteriniń kómegimen jaryq kórdi. Kitaphana dırektory Ǵalym Nurlanov bul jobanyń áleýmettik mańyzy zor ekenin aıtady.
«Bizdiń basty mindetimiz – kórý qabileti buzylǵan azamattardyń aqparatqa teń qoljetimdiligin qamtamasyz etý. Jańa Konstıtýsııa jobasynyń Braıl qarpimen jaryq kórýi – osy baǵyttaǵy mańyzdy joba. Bul basylym oqyrmandarymyzǵa Ata zań mátinimen tolyq tanysyp, onyń mazmunyn tereń túsinýge múmkindik beredi. Eń bastysy, mundaı bastamalar qoǵamdaǵy ınklıýzıvtilik qaǵıdattaryn nyǵaıtyp, ár azamattyń quqyqtyq saýattylyǵyn arttyrýǵa yqpal etedi», dedi ol.
Mamandardyń aıtýynsha, Braıl qarpinde basylǵan jańa Konstıtýsııa jobasy kitaphana qorynda qoljetimdi bolady.
Qaraǵandy oblysy
