Eralıev aýylynyń jasy úlken anasy amandyq bolsa, bıyl toqsan altyǵa tolady. Eńbekpen eseıip, beınetpen berekesi artqan el anasy – Kemel áýletiniń kemeńgerindeı.
Taǵdyr ony tekti áýletke kelin qyldy. Joldasy Kemel Qarataev – aty ańyzǵa aınalǵan Erýbaı bıdiń nemeresi. Alaıda «bı-bolystyń tuqymy» degen jalamen qýǵyn kórip, Ońtústikke aýǵan kóshtiń quramynda boldy. Shymkenttegi Ashysaı polımetall kombınatynda eńbek etken Kemel Qarataıuly sol jerde Tynyshtyq Jumabekqyzymen tabysyp, shańyraq kóteredi.
Sóıtip, 1948 jyly elge – Arqaǵa oralyp, ujymshar jumysyna aralasty. Kelgen jyly-aq jeke otarmen qoı baǵýǵa shyqty. Sol sátten bastap Tynyshtyq ana eriniń senimdi serigine aınaldy. Qoı sońynda júrip, urpaq ósirip, shańyraqtyń shyraǵyn jaqty. Tynyshtyq ana zeınetke shyqqansha aýyl sharýashylyǵynyń órkendeýine úles qosty. Uzaq jylǵy eńbegi memleket tarapynan baǵalanyp, birneshe marapat pen tósbelgige ıe boldy.
Zamannyń zobalańy Kemel atany bir áýlettiń jalǵyz tuıaǵy etip qaldyrǵan edi. Taǵdyr úzilip kete jazdaǵan tektiniń tuqymyna Tynyshtyq anany jolyqtyrdy. Altyn qursaqty ana on alty balany ómirge ákeldi. Búginde sol ul-qyzdarynan 45 nemere, 118 shóbere, 1 shópshek tarap, bir áýlet tamyryn tereńge jaıyp otyr. Bir kezde úzilýge shaq turǵan Kemel áýleti búginde alyp báıterekteı boı túzedi. Sol báıterektiń tamyrynda – Tynyshtyq ananyń aq súti, mańdaı teri men analyq meıirimi bar.
Ol balalarymen qosa, baýyrynda ósken nemerelerine de enshi úlestirip, jeke otaý etip shyǵardy. Ǵasyr ana – áli de kúıli-qýatty. Áýlettiń toı-qýanyshy, basqa da sharýalary adýyndy ananyń aqylynsyz sheshilmeıdi.
Búginde toqsan besinshi belesinen assa da, nemere-shóbereleriniń atynan jańylmaıtyn kórinedi. Nemere-shóberelerin «Kemelimniń urpaqtary ǵoı», dep aınalyp-tolǵanyp otyrady. Jaqynda ǵasyr ana shópsheginiń de qolynan sý iship, meıirimi qandy.
Aq jaýlyqty ananyń aq batasy – urpaǵyna qýat, shańyraǵyna shýaq. Toqsan altyǵa kelse de, sanasy sergek, sózi salmaqty. Ár kelgen qonaqty jyly qarsy alyp, ótken kúnderdiń taǵylymynan syr shertedi.
Jastaıynan beınet kórgen áke men ana balalaryn oqytyp-toqytty. Áz ananyń balalary, nemere-shóbereleri mektepte sabaq beredi. Bir jaǵynan berekeli áýletti Ustazdar ustahanasy deýge de keledi. Kelinderi de shákirt júregine nur quıyp júr.
Ǵasyr ananyń úlken uly Orazbaı Kemelov uzaq jyl aýyl mektebin abyroımen basqaryp, qazir zeınet kórip otyr. Ybyraı Altynsarın atyndaǵy tósbelgi ıegeri, óńirge belgili ardager ustaz búginde aýyldyń qadirli aqsaqalyna aınaldy.
Munymen qosa, balalary da, nemereleri de ata kásipke adaldyq tanytyp, bir-bir sharýashylyqty dóńgeletip otyr. О́ndiris salasynda ónimdi eńbek etip júrgen bala-shaǵasy da bar. Jaqsynyń jalǵasy bolǵan olar aýylǵa ıigilik syılar iske kelgende aıanyp qalmaıdy.
Ardaqty ananyń eń úlken nemeresi Qaıyrbek Orazbaıuly aýylǵa degen janashyrlyǵymen, iskerligimen sońyndaǵy baýyrlaryna úlgi. Osydan úsh-tórt jyl buryn aýyl jurty úıi apatty dep tanylǵan anaǵa asarlatyp úı salyp berdi. Sonyń basy-qasynda Qaıyrbekteı el aǵasy júrip, aýyldaǵy aǵaıynnyń alǵysyn aldy.
Taǵy bir Medet esimdi nemeresi – Arqaǵa belgili atbegi. Baptaǵan nebir júırikteri talaı alamanda top jaryp keldi. Árıne, kóregendi ul asyl anasynyń aq batasyn almaı, alamanǵa báıge qospaıdy.
Alyp ananyń baýyrynda ósken Qýanysh Jeńisuly da ájesiniń tálim-tárbıesin boıyna sińirip, jasynan eńbekpen shyńdaldy. Sodan da bolar, qatarynyń aldy. Búgingi kúni qurylys sharýasyna shıraq Qýanysh alaqandaı aýyldan fırma ashyp, jastarǵa jumys berip otyr. Aýylda boı kóterip jatqan úı, qora, nysandar – Qýanysh qurǵan brıgadanyń eńbegi.
Bir qyzyǵy, áýlet shańyraqtary aýyldan alysqa uzamaıdy. Eralıev eldi mekeniniń ósip-órkendeýine eleýli úles qosyp otyrǵan Kemel áýleti osylaısha ǵasyr analarynyń aq tileýimen ǵıbratty ǵumyr keship jatyr. Osyǵan qarap, ónegeli urpaǵyn qundaqtap ósirgen Tynyshtyq anany ultty saqtaǵan uly analardyń jalǵasyndaı desek, bizdiń artyq aıtpaǵanymyz shyǵar.
Ulytaý oblysy,
Jańaarqa aýdany,
Eralıev aýyly
