«Atamura» baspasynan shyqqan kitaptardyń tusaýkeserin atalǵan korporasııanyń prezıdenti Rahymǵalı Abraruly tizgindedi. Qazaqstan Jazýshylar odaǵynyń tóraǵasy Mereke Qulkenov, jazýshy Álibek Asqarov syndy qalamger qaýym kitaptardyń lentasyn qıyp, Qyrǵyz Respýblıkasynyń «Qyrǵyz el batyry» (bizshe Eńbek eri) Medethan Sherimqul bastaǵan baýyrlas eldiń bir top zııaly qaýym ókili qatysyp, sóz sóıledi.
Rahymǵalı Abraruly sóz basynda ár avtordyń eńbegine jeke toqtalyp, kitaptardyń qundylyǵy men jazylý ereksheligine mán bere sóıledi. Avtorlar arasynan áýelgi sózdi tarıhshy ǵalym Darhan Qydyrálige usyndy.
«Tarıhty durys jazý – tarıhty jasaýmen birdeı. Bizdiń halyq tarıh jasaǵan, biraq jaza qoımaǵan. О́tkenimiz ózge avtorlardyń kózqarasymen jazyldy. Ásirese túgel túrkiniń tarıhyn túgendeý kesheýildep jatty. Sondyqtan bul eki kitap bir-birin tolyqtyrady. «Tamyr» – qazaqtyń da, qyrǵyzdyń da, jalpy kóshpeli jurttyń tamyry. Saq, ǵundardan bastap Túrki qaǵanaty, olardyń quramyna kirgen kóne memleketter, Qarahan, Moǵolstan, Altyn orda, taǵy basqasynan tamyr tartqan bizdiń irgeli memlekettik sabaqtastyǵymyz naqty derektermen, arheologııalyq qazba jumystarynyń qorytyndylarymen jazylǵan.
Ekinshisi – «Abyzdar amanaty». «Tarıhty tulǵalar jasaıdy» deıdi. Árıne, tarıhty halyq jasaıdy. Biraq oǵan baǵyt-baǵdar siltep, taǵdyrsheshti sheshimder jasap, dońǵalaqty keri júrgizýge áser etetin tulǵalar. Osy tulǵalarymyz kimder? Qazirgi Tık-tok zamanynda Real Madrıdtiń fýtbolshylaryn nemese Ilon Maskty tanyǵan jastar, ókinishke qaraı, myńdaǵan jyl boıy bizdiń memlekettik dástúrimizdi osy kúnge jalǵastyrǵan, onyń ishinde sheshendik pen bılikti ushtastyryp, úlken órkenıettermen ıyq tirestirip, ózindik jazý qalyptastyrǵan babalarymyzdy bile bermeıdi. Bul kitap – Tonykók, Qorqyt bastaǵan tulǵalarymyzdyń tarıhtaǵy orny men ónegeli ósıetteri», dedi Darhan Qýandyquly.
«Sheshendik óner» kitabynyń avtory Serik Negımov «Qazaqtyń sheshendik ónerinde bılik fılosofııasy, órkenıet tarıhy ǵana emes, ata tilimiz, ata jolymyz, dilimiz, dinimiz, kásibimiz – barlyǵy tur. Qazaq tarıhyna úles qosqan uly bılerdiń óte sırek kezdesetin sózderi bar bul eńbekte. Qalaı keńes úkimeti ornady, solaı bı-sheshender ádebıeti sý túbine ketti. 1931 jyly ǵana Sáken Seıfýllın «Bıler dáýiri ádebıetin» shyǵardy, onysy erlik. 1945 jyly Mánshúktiń sheshesi Ámına Mámetova qazaq bıleriniń ónernamasy týraly dıssertasııa jazdy. Sol áli kúnge deıin shyqqan joq. 160–170 bet. Sırek qoljazbalarda saqtalǵan bıler murasyn ár jerden jınap, qurastyryp, álgindeı olqylyqtardyń ornyn toltyrý maqsatynda biz kezinde osy eńbekti jazyp, jarııaladyq», dedi.
Ádebıet synshysy Amangeldi Keńshilikuly bul kitabyna toptastyrylǵan eńbekteri kezinde gazet betterinde basylyp, oqyrmannyń kóńilinen shyqqan jazbalar degendi aıtty. «Munda Muqaǵalı týraly essem engen. Biz bala kúnimizden ol kisi týraly ańyzdardy estip óstik ári ákemniń aqyn aǵasy. Ańyz aqyn týraly jazý kópten bergi arman boldy basynda. Bertinde Astanaǵa qonys aýdarǵanymda Almatyǵa degen saǵynyshpen qosa Muqaǵalıdy da saǵynyp, aqyn shyǵarmashylyǵy týraly júrek syrlarym aqtarylyp, sol keıin kitapqa aınaldy» deıdi avtor. Qostanaıdan arnaıy kelgen qart oqyrman Amangeldi Keńshilikulyna alǵys aıtyp, syı-joralǵy jasady.
Astanada boı túzegen Manas eskertkishiniń ashylýyna kelgen bir top qyrǵyz eliniń ókili atynan sóılegen Medethan Sherimqul qazaq jurtyna alǵys aıtyp, Darhan Qydyráliniń «Tamyr» atty kitaby qyrǵyz tilinde de shyǵyp jatqanyn málimdedi.
