Foto: kchs.tj
«20 sáýirde Saryaǵash qalasynda sý tasqynynan zardap shekken Qazaqstan halqyna gýmanıtarlyq kómek tapsyrý rásimi ótti. Gýmanıtarlyq kómekke azyq-túlik, aýyz sý, qurylys materıaldary men úı shatyrlary kiredi. Dýshanbe men Hýdjandtan 61 vagon men 13 júk kóligi jóneltildi, olardyń jalpy salmaǵy 3,5 myń tonnany qurady», delingen habarlamada.
Tájikstan bıliginiń habarlaýynsha, gýmanıtarlyq júkti Tótenshe jaǵdaılar komıtetiniń basshysy Abdýhalım Nazarzoda tapsyrǵan. Ol óz sózinde Tájikstan Prezıdenti Emomalı Rahmonnyń tapsyrmasymen qazaq halqyna qajetti kómek kórsetiletinin aıtty. QR Tótenshe jaǵdaılar mınıstriniń birinshi orynbasary baýyrlas tájik halqyna alǵys bildirdi.
Aıta keteıik, buǵan deıin Qyrǵyzstan Qazaqstanǵa 300 tonna gýmanıtarlyq júk tıelgen 15 júk kóligin jibergen edi. Onyń ishinde sý, kúrish, qaraqumyq, kámpıt, shaı jáne basqa da azyq-túlik ónimderi, sondaı-aq shatyrlar, elektr shamdary, jylytqyshtar, tósek-oryn, matrastar, kıim-keshek boldy. Al 13 sáýirde kómektiń ekinshi legi – 144 tonna júk jóneltildi.
