Foto: stan.kz
Mundaı tapsyrmany Qarjylyq monıtorıng agenttiginiń tóraǵasy Dmıtrıı Malahov berdi. Ol bıýdjetten bólingen aqshanyń qaıda ketkenin sapaly tekserý men baǵalaý qajet ekenin alǵa tartty.
«Agenttiktiń aýmaqtyq departamentteriniń basshylary memlekettik organdar men sharýashylyq sýbektileriniń qyzmetine aralaspaı, bógetter, sý burý obektilerin salý, sondaı-aq ózen arnalaryn tereńdetý úshin aqshany utymdy paıdalanýdy zerdeleýi qajet», dedi Dmıtrıı Malahov.
Eske salaıyq, Memleket basshysynyń tapsyrmasy boıynsha Úkimet, kvazımemlekettik kompanııalar, kásipkerler men qoǵamdyq qorlar 140 mlrd teńgeden astam qarjy bólgen. Osy tusta QMA basshysy eldegi sý tasqyny saldaryn joıý maqsatynda bólingen qarjyny maqsatty paıdalaný men zardap shekken barlyq azamatqa naqty kómek kórsetý sharalaryn qamtamasyz etýdi tapsyrdy.
Nátıjesinde, qarjylyq monıtorıng organdary Almaty qalasynda, Aqtóbe, Qyzylorda jáne Ulytaý oblystarynda aqsha jymqyrý belgileri boıynsha tórt is qozǵady. 5 adam kúdikti dep tanyldy. Zalaldyń jalpy somasy 1 mlrd teńgeden asty.
«Sonymen qatar «zardap shekkenderge kómektesý» úshin aqsha jınaıtyn alaıaqtarǵa qarsy is-sharalar kesheni qabyldanady. Odna bólek baǵanyń ósýine jol bermeýge erekshe nazar aýdarý tapsyryldy. Ol úshin azyq-túlik, aýyzsý, dári-dármek jáne basqa da qajetti zattardyń baǵasyna monıtorıng júrgiziledi», delingen QMA habarlamasynda.
Sondaı-aq qurylys materıaldarynyń baǵasymen alypsatarlyq táýekelderin aldyn alý qyzmeti de jandandy. Anyqtalǵan faktilermen kúres analıtıkalyq quraldardy paıdalana otyryp júrgiziledi.
