Foto: QR Prezıdentiniń baspasóz qyzmeti
Premer-mınıstr sý tasqynynan zardap shekkenderge keltirilgen shyǵyndy óteý ótken aptada bastalǵanyn eske saldy.
«Qazirgi ýaqytta 11 myńǵa jýyq otbasy 100 AEK kóleminde tólem aldy (2024 jyly 369 200 teńge). Kásipkerlerdiń shyǵyny da óteledi. Bul kóp jumystyń basy ǵana. Sonymen qatar, 100 AEK ótemaqyǵa qosymsha 150 AEK (2024 jyly 553 800 teńge) tóleımiz, bul shamamen 553 myń teńgeni quraıdy, bul aqshaǵa turǵyndar qajetti zattardy: tońazytqysh, ústel, oryndyq, ydys-aıaq, kıim-keshek satyp ala alady», dedi Bektenov úkimet otyrysynda.
Sonymen qatar Úkimet basshysy Qazaqstannyń keıbir óńirlerinde sý basý qaýpi áli de seıilmegenin, ózenderdegi sý deńgeıiniń kóterilý faktileri tirkelip jatqanyn tilge tıek etti.
«Osyǵan baılanysty Tótenshe jaǵdaılar mınıstrligine óńir ákimdikterimen birlesip, sý tasqyny jaǵdaıyna kúsheıtilgen monıtorıngti jalǵastyrýdy jáne qajet bolǵan jaǵdaıda turǵyndardy májbúrlep evakýasııalaýdy tapsyramyn», dedi Bektenov.
Premer-mınıstrdiń tapsyrmasyna sáıkes, Ekologııa jáne tabıǵı resýrstar mınıstrligi sý qoımalary men ózenderde ólsheý stansalarynyń sanyn kóbeıtý qajet.
Qyrmyzy JUMAǴALIQYZY,
EUÝ stýdenti
